Arsenal record khum thei an awm lo

Premier League-a chak zawn rei thei ber chu Arsenal an nih chhunzawm zel. Hneh theih loh team 'invincibles' pawh din thei Arsene Wenger-a'n kum 2001-2002 khan a naute chu a zawnin league match 14 chhung zet hnehna chan zawn puin season tawpah champion nomawi an chawi zui bawk.

Kuminah Antonio Conte-a'n Chelsea a enkawl ṭan a, nikum September thla khan Arsenal 3-0 in an hneh lo. Italian manager hian Blues thar dinin zuin October, No­vem­ber leh December chhung khan league match-ah hnehna an chang fai vek a - an chak zat chu match 13 a ni!

Nilaini zan khan Chelsea hi Tottenham khelmualah an lenglut a, 2-0 in an chak lo. Conte naute hian Arsenal record nih rual thei rih lo mah se an thlen chin hi Premier League chanchina record ṭha pahnihna a ni tho. Gunners leh Blues te chiah hi English club te inelna sang bera kum khat chhunga a zawna match 13 chhung hnehna chang tling thei an la ni.

Nghilh lo tur chu...

Kum 2002 February 10 a ni a, hetih hunlai hian Arsenal chu Premier League table-ah palina an ni mek. League hmahruaitu Manchester United nen an inthlauhna erawh point thum chiah a ni thung. Wenger-a naute hi Everton khel turin Goodison Park-ah an lenglut a, second half-a Sylvain Wiltord goal khung hmangin hnehna an chang - a hun laiin engin nge zui dawn tih hre lo mah se tunah erawh record siam bul-ṭanna tiha hriat zui a ni tawh.

Arsenal hian Highbury-ah Fulham 4-1 in an hneh zui a, he mi hnuah St James’ Park-ah leng lutin Dennis Bergkamp-a goal ropui hmangin Newcastle United 2-0 in an hneh - hemi ṭuma Bergkamp goal khung hi 'goal of the season' a ni hial.

Manchester United chu an khelmualah Middlesbrough-in an barakhaih a, hetih lai hian Arsenal chuan Sunderland leh Charlton te 3-0 a hnehin league hmahruaitu thar an ni. Wenger-a naute hian April thla tirah an hmelma kumhlun Tottenham an mikhual a, Freddie Ljungberg-a goal hmangin hma hruai mah se Spurs hian Teddy Sheringham-a penalty chhuih luh hmangin an sut.

Spurs nen hian an inhneh­tawk dawna a lan hnuah Lauren-a goal hmangin Arse­nal hian hnehna an chang a, a zawnin match riat hnehna an chang chiah. Ipswich, West Ham United leh Bolton te an hneh hnuah Wiltord-a goal khat hmangin Manchester United 1-0 in an hneh a, kum 1960-61 a Tottenham-in record an lo siam tawh match 11 chung chak zawn record an khum chiah.

Nomawi an chawi chian hnuah pawh Arsenal hian hnehna an chan chhunzawm zel a, 2001-02 season khar nan Everton 4-3 in an hneh. Season thar bul ṭan nan Birmingham 2-0 in an hneh leh a, thla ruk chhungin match league 14 chhung a zawnin hnehna an chang. Upton Park-ah West Ham nen 2-2 a an inhenhtawk hnuah 19 October, 2002 khan kha tih hunlaia rawlthar duhawm Wayne Rooney goal hmangin Everton 2-1 in an ngam lo.

Arsenal-in chak zawn rei record an siam kum hian league nomawi an chawi bakah FA Cup final-ah Chelsea 2-0 a hnehin nomawi an chawi bawk. Kum 2001-02 season hian Wenger-a'n season nga chhunga a vawi hnih nan a club chu nomawi pahnih a lakpui, he an chanchin ngaihnawm hi tun thlenga Gunners fan-te titi tui ber pakhat a la ni reng a, a ni zel bawk ang.