Real Madrid tlawm thei an awm lo

Spanish club Real Madrid chu match 38 zet tlawm hmel hmu loin an kaltluang ta - Zine­dine Zidane a naute hian Nilaini zan khan Copa del Rey last 16 first leg-ah Sevilla an mikhual a, James Rodriguez goal hnih khung chhawr ṭangkaiin Santiago Bernabeu a inkhelah hian 3-0 in hnehna an chang.

Real tan inkhel ṭantir aṭangin James Rodriguez a langsar nghal a, Colombian attacking midfieldfer hian minute 11-na lekah goal ropui khungin Madrid khaw club hi hma a hruaipui. French defender Raphael Varne chuan minute 29-naah an hmahruaina nemnghet turin goal dang a khung ve lehnghal a, minute 44-naa Mariano-a'n Luka Modric a tih tluk vanga a penalty hlawh chhuah chu Rodriguez bawkin goal-ah chantirin Sevilla-in a chhanletna tur an nei thei lo.

James a inlar

Zidane-a'n tlarhma lama a innghahna Cristiano Ronaldo chu chawlh hahdamtirin Portuguese forward hi a inlan lo a, Karim Benzema chu bench-ah dah niin Gareth Bale chu hliam vangin a la inlan thei lo bawk. Real tan BBC tia hminglem an pel player pathum inlan theih loh chhawr ṭangkai bertu chu James Rodriguez a ni.

Colombia tan vawi 52 inlana goal 17 khungtu hian tun season-ah Real tan hmun a chan phak meuh loh avangin January transfer-a a hmalam hun a tih chian tur thu a lo sawi tawh a, kumthar a her chhuah meuh erawh chuan match hmasa berah inkhel bul ṭanin goal hnih a khung nghal.

Tun season a inelna hrang hranga match 17 chiah khela league match riatah chauh inlan thei attacking midfielder hi tunah chuan a hlim leh tawh a, Colombia captain chuan, "He squad a awm player zawng zawng hian inkhelh kan duh vek a, kan duh hmu tur hian hun harsa kan paltlang a ngai vek bawk a ni. Mahse, tunah chuan ka tan kumthar a inṭan tawh a, Madrid chhuahsan ka duh lo," a ti.

James chuan sawi chhun­zawmin, "Ka duh ber chu hun ṭha ka neih apianga ka theihna sang ber pholan zel hi a ni a, ka team tan tha ka thawh avangin ka hlim a ni. Result ṭha tak kan hlawh chhuak a, mah se Sevilla khelmuala la inkhel leh tur kan nih avangin chawl thei kan la ni lo," a ti a, January 13 a an inhmachhawn leh tur chu a thlirlawk.

Zidane a lawm

Real Madrid manager Zidane chuan, "Player ṭhenkhat kan chhawr theih loh avangin player dang tan thawhrim a ṭul tihna a ni a, kan beisei leh duh ang ngeiin thil kha a kaltluang a ni. Match 38 chhung tlawm hmel hmu loin kan kal tawh a, thil awlsam a nih loh avangin ka player-te ka lawmpui duh a ni," a ti.

Spanish club a manager a nih kum khatna a lawm zana a team hnehna chanpuitu coach chuan, "First half-ah khan kan khel ṭha em em a, hma taka kan goal khung khan min pui hle a ni. Sevilla laka goal thum khunga chhuah ve miah loh hi thil awlsam a ni lo," tiin a naute khelh dana a lawm thu a sawi.

Real-in penalty an hlawh­chhuah danah referee thutlukna chu sawisel theih tak ni mah se Sevilla coach Jorge Sampaoli-a'n chhuanlam a tan a hmang duh lo. Kum 56-a upa manager chuan, "Kan inkhel danglamna chu Real Madrid tawp kha an ni. Team ṭha zawk an ni a, referee thutlukna avanga chak lo kan ni lo. First half aṭangin inkhel an thunun a, kan ngam ngang lo a ni," tiin an chak loh a pawm thiam hle.

Nilaini zan inkhel dangah Real Sociedad chuan Willian Jose, Carlos Vela leh Mikel Oyarzabal te goal khung hmangin 3-1 in Villarreal an hneh a, Alcorcon leh Cordoba chu goal khung loin an inhnehtawk bawk.