Zaninah Champions League semifinal English champion Vs Spanish champion

Champions League nomawi duha tuihal Manchester City-in fiahna hautak an hmachhawn dawn a, Pep Guardiola hote hian zanin dar 12:30 hian UCL semifinal first leg-ah record nei ṭha ber Real Madrid an mikhual dawn.

May 4, Nilaini zan hian Santiago Bernabeu-ah second leg an khel leh dawn. Tun season-ah away goal rule a awm tawh lo a, inkhel kalhmang a danglam phah. First leg-ah Man City chungnung tura beisei an ni a, amaherawhchu final lut tur chuan inkhel pahniha goal khung tam zawk nih a ngai thung.

Man City hun?
Season liam ta khan Manchester City hun a inher chhuak dawnah a ngaih theih a, mahse Pep Guardiola hote hi hun pawimawh ber final-ah an chesual. Tun ṭumah insiamṭhatna hun ṭha nei mah se an khingpui tur Real hi European champion ṭum 13 ni tawh an ni a, a awlsam dawn lo.

Kum hnih liam taa Man City-in Real an mikhual ṭumin Spanish club hian Pep-a hote pressure na tak chu an ngam lo a, tun ṭumah pawh a danglam tam lo ang. English champion hian an mualah chak ngei tumin semifinal first leg-ah pressure an pe na khawp ang.

City hian tlarhmaah duh thlan tur an nei a; Riyad Mahrez, Phil Foden leh Bernardo Silva te chu thlan tura beisei an ni. Mahrez hian tun season UCL-ah goal ruk a khung tawh a, chutihrualin Watford laka goal li khungtu Gabriel Jesus hian Real an hneh hnuhnun berah goal leh assist a nei. Raheem Sterling leh Jack Grealish te an la awm cheu bawk.

Chutihrualin Man City sawi ruala hming lam hmaih thiang lo chu Kevin De Bruyne a ni a, Belgian midfielder hi team khaikhawmtu niin team tan a pawimawh takzet. Pep Guardiola tan Barcelona a chhuahsan hnua a chawi tak loh UCL nomawi chawi leh tur chuan De Bruyne kutah thui tak a innghat.

Benzema a vul
Karim Benzema-a'n Cristiano Ronaldo vanglai a tawn fuh avangin a vul tur angin a vul tawk lo a, chutihrualin kum 34 mi hi tun season-ah erawh a vul hle. Benzema hian match 40 khel tawhin bul a ṭan vek a, goal 39 khungin assist vawi 13 a nei.

French forward goal khung dan hi belhchian a dawl a, Benzema goal awm lo se PSG leh Chelsea lakah an tlawm thei dawn. Real-in Benzema an mamawh a, Man City erawhin an ven ṭhat a ṭul thung. Pep-a'n hrem vangin Joao Cancelo a chhawr thei dawn lo a, uluk lehzuala ruahmanna a siam a ṭul dawn a ni.

Real Madrid hian kartawpah Osasuna 3-1 in an hneh a; Toni Kroos leh Vinicius Jr te bench-ah an dah bakah Luka Modric an awltir tawp bawk. Man City lakah Kroos, Vini Jr leh Modric te an rawn kir a rinawm a, Casemiro-a'n team training a la zawm loh avangin kum 19 mi Eduardo Camavinga pawhin hmun pawimawh a chang thei bawk.

Engtin zel?
Man City manager Pep Guardiola chuan, "Atletico nen second leg kan khelh ṭuma second half anga kan khel a nih chuan Real Madrid lakah chance kan nei lo. Chutihrualin first leg-a kan khelh dan leh second leg first half kan khelh dan anga kan khelh chuan final beisei theih dan a awm ang," tiin an inkhel tur chungchang a sawi.

Real Madrid coach Carlo Ancelotti hian Everton a enkawl laiin Pep Guardiola enkawl Man City hi a hmachhawn tawh a, khawvela team ṭha ber an nih thu a lo sawi tawh. Tun ṭumah erawh Ancelotti hian club ropui zawk Real a enkawl leh tawh a, a thlir dan a dang tawh dawn. Real Madrid tan tluk loh ena Man City en a rem lo.

Semifinal kalkawng
Man City hi PSG, RB Leipzig leh Club Brugge te nen group khatah an awm a, group hmahruaitu nichungin knockout stage an lut. English champion hian point 12 an hmu a, PSG leh Leipzig lakah ṭum khat ve ve an chak lo.

Last 16-ah Man City-in Sporting Lisbon an hmachhawn a, khualmualah 5-0 in an sawp. Etihad Stadium-ah goal awm loin inhnehtawk mah se City-in nuam sa takin quarterfinal an lut. Pep-a hote hian quarterfinal-ah defensive khel thiam Atletico an hmachhawn a, Man City hian Etihad Stadium-ah inkhel thununin Kevin de Bruyne goal hmangin 1-0 chauhin an chak. Wanda Metropolitano-ah Man City-in goal an khung belh thei lo a, hun tawp lamah harsatna tawkin keeper Ederson zarah goal awm loin an inhnehtawk.

UCL-a record ṭha ber Real Madrid hi season bul ṭannaah Sheriff Tiraspol lakah 1-0 in an tlawm. Carlo Ancelotti hote hi insiamṭha zuiin an group-a awm dang Inter Milan leh Shakhtar Donetsk bakah Sheriff te chu an hneh leh vek a, point 15 hmuin hmahruaitu an ni.

Los Blancos hian last 16-ah PSG an hmachhawn a, khualmualah zawr viau mah se Paris-ah Kylian Mbappe chauhin goal a khung. Madrid-ah Karim Benzema a inlar a, French forward hattrick hmangin Carlo Ancelotti hoten 3-1 in hnehna an chang a, aggregate-ah 3-2 in an chak.

Quarterfinal-ah Real-in champion lai Chelsea an hmachhawn. Spanish club hian Stamford Bridge an luhchhuah a, Benzema-a'n hattrick siam nawnin 3-2 in hnehna an chang. Santiago Bernabeu-ah erawh mualneitu Real an talbuai a, 3-1 a an tlawm avangin extra time khelh a ngai hial. Mahse, Real-in Benzema an kawl a, French striker hian extra time-ah chakna goal a khung.

Real an chungnung hret
Real Madrid leh Manchester City te hi Champions League group stage-ah an awm ho tawh a, last 16-a an inhmachhawn tawh bakah semifinal-ah an intawng tawh. An inkhelh tawhnaah hian Spanish club an chungnung hret.

Kum 2012 khan group stage-ah Man City leh Real te hi an awm ho a, Santiago Bernabeu-ah Los Blancos hi 3-2 in an chak. Etihad Stadium-ah erawh 1-1 in an inhnehtawk. Inkhel pahnihah hian tun ṭuma Real innghahna Karim Benzema-a'n goal a khung ve ve.

Man City hian kum 2016 khan Manuel Pellegrini hoin semifinal an thleng a, Etihad Stadium-ah Cristiano Ronaldo tel lohna Real Madrid chu goal awm loin an chelh. Second leg-ah erawh Ronaldo a rawn kir a, Los Blancos hian inkhel thununin 1-0 in hnehna an chang.

Kum 2020 khan Real leh Man City hi last 16-ah an inhmachhawn a, English club hi Pep Guardiola-a'n a enkawl tawh avangin inkhel kalhmang a dang ta. Man City-in 2-1 ve vein hnehna an chang a, aggregate-ah 4-2 in a chak.

Team pahnih hi an inkhelh tawhnaah Real Madrid an chungnung hret a, amaherawhchu Guardiola-a'n Man City hi a la ho reng avangin English club hi dah hniam a thiang lo.

Inlan tura beisei
Manchester City: Ederson; Walker, Ruben Dias, Laporte, Zinchenko; De Bruyne, Rodri, Bernardo Silva; Mahrez, Foden, Sterling
Hrem: Joao Cancelo
Real Madrid: Courtois; Carvajal, Eder Militao, Alaba, Mendy; Modric, Casemiro, Kroos; Valverde, Benzema, Vinícius Junior
Hrem: An awm lo

UCL - Semifinal
First Leg

Zanin Inkhel Tur
Manchester City 12:30 AM Real Madrid

April 27, Nilaini
Liverpool 12:30 AM Villarreal

Second Leg
May 3, Thawhlehni zan
Villarreal 12:30 AM Liverpool

May 4, Nilaini
Real Madrid 12:30 AM Manchester City