MPL U18-ah semifinal khel tur a hriat ta

Mizoram Football Association leh Mizoram Youth Commission buatsaih Mizoram Premier League Under 18-ah nimin khan champion lai Aizawl FC-in Electric Veng an hneh loh avangin semifinal beiseina a tawp. Vawiina inlan tur Mizoram Police erawhin Chhinga Veng, Chanmari leh Venghnuai te hnung zuiin semifinal an lut thung.

Aizawl FC-in chak an mamawh tih hriain Electric Veng an hmachhawn a, Lalremtluanga hmangin minute 67-naah hma-hruaina goal an khung. AFC hi chak thei turin an dinhmun a ṭha a, amah-erawhchu injury time-ah an chesual. Electric Veng tan Lalawmpuia leh Dylan Zodinsanga ten an khung belh a, 2-1 in an lehthal.

Inkhel hnuhnung zawkah Chhinga Vengin Vanlalfakawma leh Lalnunzira Sailo te goal hmangin FC Venghnuai 2-1 in an hneh a, league round-ah pakhatna dinhmun an luah. Chhingcows hi semifinal-ah palina nen an inkhel dawn, FC Venghnuai emaw Mizoram Police emaw an hmachhawn ang.

Semifinal hi April 28, Ningani hian khelh a ni dawn a, vawiina inkhel result a zirin inhmachhawn tur a chiang ang. Chhun dar 12:30-ah Mizoram Police-in Chanmari an hmachhawn dawn a, Police hi an chak a nih chuan an pahnih bawk hian semifinal-ah an inkhel ang.