Rudiger-a'n Real Madrid a pan dawn

Chelsea-in Pathianni zan khan West Ham 1-0 in an hneh a, Premier League-ah pathumna dinhmun sawhnghet mah se chanchin lawmawm lo hriat tur a awm zui. Blues defender pawimawh Antonio Rudiger-a'n London club a chhuahsan dawn a, German defender hian Real Madrid nen inremna a nei tawh.

Blues hian kum 29 mi Rudiger hi kar khata £200,000 hlawh turin contract thar an zawrh a, Chelsea history-a defender hlawh tam ber a ni thei ang. Amaherawhchu Rudiger te lamin contract ziahna man leh agent fee an beisei zat a san lutuk avangin London club hian an chelh thei lo.

Chelsea manager Thomas Tuchel chuan, "Mimala kan inbiak ṭumin a chhuah tur thu hi min hrilh tawh. Chelh turin theihtawp kan chhuah a, tunah chuan tih theih kan nei tawh lo. Kan kut phuarin a awm a, hremin awm lo ta ila chuan thil thlen dan hi a dang mahna. Kan player pawimawh a ni a, hmun pawimawh a chang chhunzawm ang," tiin Rudiger-a chungchang a sawi.

Rudiger hi inhliam vangin West Ham an hmachhawn ṭumin a inlan lo. Blues hian hnehna chang turin vanneihna an mamawh a, Jorginho-a'n hun tawp dawnah penalty a hlah hnuin substitute Christian Pulisic-a'n minute 90-naah chakna goal a khung.

London club hi tun nipuiah centre back dang Andreas Christensen chân thei dinhmunah an ding bawk. UK sorkarin club neitu Roman Abramovich laka hremna an lekkawh hnuah club sum dinhmun hi a chiang lo a, tun thlenga club neitu thar an la neih loh avangin khelmual pawnah an buai hle.