Mumbai an chak thei lo

Indian Premier League-ah record nei ṭha Mumbai Indians-in match riat khelhah an khingpui an hneh lo vek. Pathianni zan khan Mumbai hian Lucknow Super Giants an hmachhawn a, 36 runs-in an hneh lo.

Wankhede Stadium-ah Mumbai-in vawm hmasak an thlang. Lucknow tan captain KL Rahul a che ropui a, thi loin 103 runs a siam. Man of the match-a thlan KL Rahul chet ṭhat zarah Lucknow-in 168/6 runs an tlin.

KL Rahul hian IPL-ah century vawi li a siamna a ni a, Mumbai lakah vawi thum ngawt a siam. Lucknow captain hian IPL-a century siam tamah Chris Gayle (6) leh Virat Kohli (5) te chiah a tluk lo.

Mumbai Indians bat hun a thleng a, captain Rohit Sharma-a'n 39 runs siam mah se a bul ṭanpui Ishan Kishan erawhin run riat chauh a siam. Mumbai hian Kishan hi auction-ah nuai 1525 in an la a, a chet ṭhat leh si loh avangin sawiseltu an tam hle.

Lucknow bowler lakah Mumbai batter an thamral a, over 20-ah 132/8 runs chauh siam. Super Giants hi 36 runs-in an chak a, IPL club thar hi a sang pali zingah an awm.

Zanin dar 7:30 hian Royal Challengers Bangalore leh Rajathan Royals te an inkhel leh ang.