Verstappen a tlan chak ber

Tlankawng huh leh hnawng takah Max Verstappen chuan hnehna a chang. Formula 1 champion lai hi Emilia Romagna Grand Prix-ah Sergio Perez hmaa thlengin pakhatna a ni a, nomawi humhim turin kawng dik a zawh.

Red Bull driver hi qualifier lamah pawh a tlan ṭha ber, tlankawng a huh avangin chetsaul palh hlauhawm viau mah se Max a chesual duh lo a, season bul ṭan fuh Ferrari driver Charles Leclerc tan umphak rual a ni lo.

Dutch tlangval hian a teammate Perez aiin second 16 zetin a thleng hmasa zawk, kumina inelna an neih tawhah ṭum hnih ngawt che fuh lo mah se, tunah chuan driver championship-ah pawh pahnihna dinhmun a luah leh thei tawh a ni.

Red Bull driver Verstappen chuan, "A bul ṭan fuh kha a pawimawh a, a hnu lam chu khaw awm dan khan a hril thui tawh hle. Team lam thlawpna ka dawng ṭha a, khawl lam harsatna a thlen loh avangin ka lawm," tiin a sawi a, hmasawn an tum thu a sawi bawk.

Ferrari driver Charles Leclerc erawh paruknaah a thleng. Monaco tlangval hian inelna an neih hma khan, champion lai Max nen an naupan lai aṭanga inel an nih thu a sawi, tun ṭum intlansiakah chuan qualifier lam tlan chhe lo mah se a takah tihsual a neih zauh a tuar.

Championship hmahruaitu Leclerc chuan, "Pathumna ni thei tur ka ni a, eng emaw thleng palh zeuh vangin parukna ka ni. Point hlawh chhuah a inthlau viau, season tawpah a pawi ang tih a hlauhawm hle," a ti.

Vawi sarih champion tawh Lewis Hamilton pawh a la che fuh thei lo. Mercedes driver hi 13-naah a thleng hram, season kal laia intlansiak vawi li an hmachhawn tawhah chak ni hmel a la hmu ve lo.

Mercedes team boss Toto Wolff chuan, "Tun ṭum intlansiak chu theihnghilh daih tlak a ni. A nihna tak sawi chuan kan car kha team dang car tlan pel turin a chak tawk lo," tiin a sawi a, an driver chuan car ṭha zawk a phu tih a sawi bawk.