A zawna vawi li champion thei Swiatek

Hmeichhe tennis world number 1 Iga Swiatek chuan player ṭha bik a nihna a lantir zel, tournament a khelh hnuhnung paliah a champion vek! Aryna Sabalenka hnehin Stuttgart Open title a vaw chhuak leh ta.

Pathianni zan final inkhelah Polish nula hian 6-2, 6-2 in hnehna a chang, a khingpui hi world number 4 lai ni mah se Swiatek hian remchang a siamsak eih lo a, set hnih an khelh chhungin a chungnung hle.

Stuttgart Open hma hian Doha, Indian Wells leh Miami Open-ah hlawhtlinna a lo chang tawh bawk, clay court inelna lian French Open an khelh turah pawh champion tura rinkai ber a ni ang, clay hi a inkhelh thiamna hmun a ni.

Thla hmasa khan world number 1 ni lai Ashleigh Barty chuan tennis a chawlhsan thut a, hei vang hian number 2 Swiatek chu pakhatnaah a chhoh theih phah, number 1 a nih hnuah pawh dan theih lohin a kal zel.

Kum 20 mi Swiatek chuan, "Inkhel awlsam a ni lo, game khat la tur pawh khan thapui thawh a ngai zel. Aryna nena inkhelh hi chu a hautak ziah a ni," tiin awlsam taka hnehna chang a nih bik loh thu a sawi.

Point hnuhnung ber a hmuh hnuah Swiatek hi lawm avangin a zuang a, tun hnaia nomawi pali a lak lantir nan a kutzungṭang pali a tilang. French Open inbuatsaih nan Madrid leh Rome Open khelh hmabak a la nei leh ang.