Liverpool beiseina a nung; a hnuai lamah Everton

Premier League champion ni turin Liverpool-in beisei an nei ve zel a, Pathianni zan khan an mikhual Everton chu 2-0 in an hneh - Manchester City nen an inthlauhna chu point khat a ni zel.

Liverpool tan Andy Robertson leh substitute Divock Origi te chuan goal khat ve ve an khung a, Everton-in a chhanletna tur an neih loh avangin Anfield-ah an tlawm.

Reds-in hnehna an chan avangin champion an beisei a, an ṭhenawm club Everton erawh tla thei dinhmunah an ding - a hniam pathum zingah an awm a, season tharah Championship an khel a nih pawhin a mak lo ang.

Merseyside derby khelh hma hian Burnley chuan 1-0 in Wolverhampton Wanderers an hneh a, 18-naah Everton an tlak phah. Frank Lampard-a naute hian Liverpool hneh se 17-naa chho leh nghal tur an ni a, mahse, an tlawm miau avangin relegation zone an chhuahsan thei rih ta lo.

Everton an khawng
Anfield-a an lenluh hmain Everton-in relegation zone-ah an awm tih an hre hman a, coach Lampard-a'n Reds laka attacking football khelh tum ai chuan inven a finthlak zawk tih a hria.

English coach ruahman ang ngeiin tlarhnungah Everton an inremphui ṭha a, Manchester City leh Manchester United laka goal sarih khung hlim Reds-in sut tlang an harsat a, game mawi an khel thei lo.

Everton-in game mawi khel chunga chak tum aiin, mipui ngainat lo pawh ni se, defensive game khel chunga point hlawhchhuah an tum a, an tumah an chian avangin Reds fans an hlauthawng hman.

Minute 45 chhungin goal a lut lo a, Everton an tumah an hlawhtling a tih ngam. Anfield erawhin an beisei ang game hmuhnawm an hmu lo a, nomawi pali chawi tum Reds fan-te an hlauthawng.

Klopp-a thluak
Liverpool boss Jurgen Klopp-a'n Everton tlarhnung ṭhiah dan tur a ngaihtuah a, minute 60-naah Naby Keita leh Sadio Mane la chhuakin Origi leh Luis Diaz a luhtir - thutlukna a siam sual lo tih a lang zui.

Khelmual an luh aṭanga minute hnihna lekah Mohamed Salah-a ball pek chu Origi-a'n Salah ke bulah bawk a dah a, Egyptian forward hian angle chep tak aṭanga pet lui mai loin Robertson tan ball a thlawh lut.

Scottish defender hian Premier League fullback ṭha ber pawl a la ni reng tih pholangin a tauh lut a, thlaphanna nena inkhel entu Reds fan-te an thaw huai - an thawm chu ring tak a ni.

Hun tawp nan minute nga chiah a awm tawh a, Liverpool-in an duhtawk lo - Origi chuan mamawh chhanna a ni tih pholangin a khung ve leh a, 2-0 in Liverpool an chak.

An inthlau
Everton-in rei tak chhung Liverpool an chelh thei a, mahse, a tawpah chuan coach leh squad nei ṭha zawk danglamna a lang a, Merseyside derby-ah Liverpool an chak.

Reds-in goal an khung theih loh laiin Origi leh Diaz an luhtir thei a, Origi-a'n tun season-a a goal rukna a khung hi Diaz-a bicycle kick aṭanga kal a ni a, Diaz che vel a hmuhnawm leh pek hle.

Hei chauh a ni lo - Liverpool-in goal an khung hnuah pawh Everton an rawn hlauhawm ve a, mahse, Klopp-a'n khelmuala a naute fuih phur tur leh game thlak turin Jordan Henderson chu bench aṭangin a la luhtir thei.

Everton hian inkhel an thlirkir ang a, Demarai Gray-a'n chance duhawm a neih, goal-a a chantir theih loh chu an ui vawng vawng ang.

Hmabak
Liverpool-in hnehna an chan avangin League Cup bakah Premier League, FA Cup (final) leh Champions League (semifinal) an la beisei zel a, quadruple champion nih ngei an tum.

Reds hian Nilaini zan dar 12:30-ah Champions League semifinal first leg an khel zui dawn a, Villarreal an mikhual dawn - hnehna chan ngei an beisei ang.

Everton tan Premier League inhamtang turin tlawm a thiang tawh lo - May 1, zan dar 6:30-ah Chelsea an mikhual zui dawn a, league match ruk khelh tur an la neihah Arsenal an la hmachhawn dawn bawk.

A thim zawnga thlir chuan Everton hmabak a êng lo. Chutihrual chuan 17-na Burnley an phak lohna hi point hnih chauh a ni tih hriat tel sak a ṭha a, match khatin an khel tlem zawk.

Coach ban fuh Burnley
Pathianni zan Premier League inkhelah Burnley chuan 1-0 in Wolverhampton Wanderers an hneh a, relegation zone an chhuahsan. Mualneitu Burnley tan Matej Vydra chuan minute 62-naah inkhela goal awmchhun a khung a, season thara Premier League khel chhunzawm turin beiseina thar an nei ve leh ta.

Burnley hian coach Sean Dyche an ban hnuah league match thum an khel a, point kua hlawhchhuah theih aṭangin point sarih an nei - an tifuh cher cher hle. Dyche an ban hnua an match hmasa berah hian team ṭha West Ham chu 1-1 in an inhnehtawkpui a, Southampton chu 2-0 a an hneh hnuah Wolves an hneh ve leh ta bawk.

Clarets (Burnley sawina) manager lailawk Mike Jackson chuan, "Tun hnaia kan result hian ka naute a pui dawn a, a hma zawng aiin thawhhona a ti ṭha lehzual dawn a ni," a ti a, English top flight league-ah a team champui theih a beisei.

Tun hnaia hnehna kan chan zat zozai hi a mak zawk a, thawhrim a ngai hle. Ka nauten an hna an hlen leh ta a, ka lawm takzet a ni. First half kan khel ṭha tawk lo a, an tlarhnung ṭhiat turin kan che tam tawk lo.
Mahse, zam miah loin kan khel tlat a, substitution kan siam khan formation a tihdanglam hlek bawk avangin min pui a, an tan a harsa tawh. 2-0 in kan chak a, ka lawm em em a ni. Divock-a'n fak a phu a, ani kha awm lo se, second half-a kan hnathawh zawng zawng kha a hlawhtling lo ang. Player khel tam tawk lote avangin tun hi kan thleng - Alex Oxlade-Chamberlain, Harvey Elliot, Takumi Minamino leh Rhys Williams thlengin an khel tam tawk lo a ni mai thei a, mahse, an khelh loh lai pawha an nungchang hian club a pui nasa tlat a ni. - Jurgen Klopp, Liverpool manager

Anthony Gordon kha vawi hnih penalty hlawh tur a ni a, mahse, Anfield-ah chuan penalty hlawhchhuah hi a harsa hle. Pakhat zawkah phei kha chuan yellow card an pe zawk a, thil mak tak a ni. A pahnihna pawh kha hmun dangah chuan penalty a ni ngei ang a, hetah chuan a ni ve lo. - Frank Lampard, Everton manager