Quartararo a inlar ta

MotoGP champion lai Fabio Quartararo chuan a nihna tak a pholang ta. Pathianni zana tlan Portuguese Grand Prix-ah hnehna a chang a, amah hnaih bertu Johann Zarco aiin second nga chuangin a thleng hmasa zawk.

Nikum khan Quartararo hi champion mah se, season tawp lam leh tun season tir lamah a che ṭha tawk lo. Pakhatna ni chiah lo mah se point hmu hnem zingah erawh a awm thei deuh reng thung, tunah chuan nikum August thlaa tlan Silverstone hnuah a chak ve leh ta.

Intlansiak hnuhnung zawk Austin, Texas-ah khan Quartararo hi pasarihna daih a ni, tun ṭumah erawh champion lai leh rider ṭha berte zinga mi a nihna a pholang thei a, championship table-ah Alex Rins nih rualin pakhatna dinhmun a luah.

Yamaha rider Quartararo chuan, "Pakhatna ka nih lohna a rei ta vang vang hle, tuna hnehna ka chang leh thei hi a hluin a danglam hle. Kumina intlansiak kan neih hmasak paliah duhthu ka sam lo, tunah chuan ka hun a thleng ve leh ta.

"Chet chhiat lai pawhin bike hi chhuanlam atan ka hmang ngai lo, a nihna anga khalh chhuak thei nih a pawimawh ka la ti reng," a ti. May 1, Pathianni hian Jerez tlankawngah Spanish Grand Prix an tlan leh ang.