Giroud awmna Milan beiseina a nung

AC Milan chuan si an phurh hmasak hnuah Lazio 2-1 in an hneh a, point 74 hmuin Serie A hmahruaitu an ni leh ta. Champion lai Inter Milan aiin point hnihin an sang a, match khatin an khel hnem thung.

Lazio mualah Ciro Immobile chu ven hman a ni lo. Italy international hian minute lina lekah goal a khung nghal, season kal laia goal 26 a khungna a ni a, anmahni muala khel an nih bawk avangin an hum rei thei viau.

Mahse, second half-ah Olivier Giroud-a'n striker ṭha a nihna lantirin a tlawh goal a, bench aṭanga lut Zlatan Ibrahimovic chuan hun tawp hma chiahin Sandro Tonali khung tur a siamsak bawk.

Milan hi champion turin an dinhmun a la ṭha viau, match khelh hmabak pali la nei mah se season thara Champions League khel tur chuan an tling chiang tawh. Manager Stefano Pioli chuan season an hman dana a lawm thu a sawi.

Italian manager Piloi chuan, "Kan tan a lawmawm, fans tan pawh a lawmawm ngei ang. Inkhel harsa takah pawh kan chak thei a ni tih kan lantir leh ta. Kan khelh hmabak la awmah pawh chak vek kan tum ang, chu chu kan tih theih sang ber a ni," tiin a sawi.

Milan hian an hmabakah Fiorentina, Verona, Atalanta leh Sassuolo te an la hmachhawn leh dawn. An elpui Inter chuan Bologna, Udinese, Empoli, Cagliari leh Sampdoria te an la tum ve thung ang.