Barcelona an tlawm leh tawh!

Ronald Koeman an ban khan Barcelona-in point rukin Real Madrid an thlau a, manager lailawk Sergi Barjuan-a'n match hnih a enkawl hnuah point 10-in an thlau zui - Catalan club ṭantute tan chuan khati zata Real phak loh kha a na.

Barca fans lawmna thar thlen turin club legend Xavi an lalut a, Koeman a thlak. Spanish manager enkawlna hnuaiah an khelh dan a hmuhnawm thar a, result an nei a, Spanish media leh fans tam takin Xavi an fak rawn.

Mahse, Xavi hian sawr zim theih loh a nei a, chu chu Real nena an inkar a ni - Barcelona hian Pathianni zan khan La Liga match awmchhunah Rayo Vallecano chu 1-0 in an ngam lo a, Alvaro Garcia chuan goal awmchhun a khung. Barca hian hmahruaitu Real Madrid nen an inkarah point 15 lai a awm ta!

Barca hi Nou Camp-ah a zawnin match thum an tlawm ta a, season khata anmahni muala a zawna an tlawm rei ber record thar an siam - Xavi tan record duhawm a ni lo.

Koeman bantu
Nikum October thla tawp lam khan Rayo hian 1-0 in Barcelona hi an lo hneh tawh a, hemi hma chiah hian Real Madrid chuan Nou Camp-ah 2-1 in Barca hi an hneh bawk.

Rayo lakah an insiamṭhat loh avangin Koeman ban a ni a, coach thar Xavi-a'n a hneh thei bik chuang lo - mahni muala an ngam hnu hi Rayo hian an hlau lo a, khualmualah 1-0 in an hneh nawn sak.

Nou Camp-a goal awmchhun hi Alvaro Garcia chuan minute sarihna lekah a khung a, Barca-in a chhanletna tur zawng mah se goal hmaah an hriam tawk lo a, an tlawm.

Barca tana na chu Rayo Vallecano hi Madrid khaw club tho an ni - Rayo laka an tlawm avangin coach erawh an ban nawn kherin a rinawm tawh lo a, chutihrual chuan Xavi tan inenfiah a ṭul ṭan tih a lang.

Barca vanduaina
Catalan club hian an vanduaina an thlir chuan chhuanlam tur an nei nual - Gavi chuan crossbar a tihper a, second half-ah attacker Memphis Depay, Luuk de Jong leh Adama Traore te lut mah se goal an khung thei lo bawk.

Barca tan Ousmane Dembélé chuan goal a khung ngei dawn niin a inngai a, mahse, defender Alejandro Catena chuan goal line aṭangin a lo pet chhuak hman. Rayo an vannei takzet.

Nou Camp hi mikhual team tan hmun ṭihbaiawm a ni ṭhin - tunah erawh a ni ta lo. Barca hian Europa League quarterfinal-ah Eintracht Frankfurt an lo ngam lo tawh a, Cadiz lakah an tlawm zui a, Rayo lakah an tlawm leh ta.

Catalan club hi 1997-98 season tawp leh 1998-99 season ṭantir khan Nou Camp-ah a zawnin vawi thum an lo tlawm tawh a, Louis van Gaal hnuaia an record duhawm lo kha Xavi-a'n a rawn nih rual - season khatah a la ni zui!

Champion a hnai
Barca an tlawm a, he result avang hian Real dinhmun a ṭha sawt - Madrid khaw club hian match nga khelh tur an la neihah champion turin point khat chiah an mamawh tawh.

Point 63 nei mek Barcelona leh Sevilla hian an hmabak match ngaah hnehna an chan vek pawhin point 78 chiah an hmu thei tawh a, point 78 neitu Real hian point khat lek an hmuh belh pawhin an tan um phak ngaihna an awm tawh lo.

Carlo Ancelotti naute hian zanin dar 12:30-ah Champions League semifinal khel turin Manchester City an lenchilh ang a, Inrinni zan dar 7:45-ah Espanyol an mikhual zui ang.

Catalan club Espanyol lakah hian draw result ringawt an hlawhchhuah pawhin an champion dawn tihna a ni - Spanish La Liga champion hre turin nghah rei a ngai ta lo.