Pelicans-in Suns an umphak

NBA regular season leh playoff boruak chu a danglam ṭhin. Seeded pakhatna ni chunga playoff kheltu Phoenix Suns leh seeded hniam ber, pariatna New Orleans Pelicans te chu series-ah 2-2 in an

inhnehtawk mek.

Nimin zing game 4 inkhelah, New Orleans Pelicans hian 118-103 in hnehna an chang. Nilaini zing dar 7:30-ah game 5 an khel leh dawn, best of seven series a nih avangin tlang tur chuan vawi li chak tlin a ngai dawn a ni.

Pelicans tan Brandon Ingram-a'n point 30 a nei a, point 26 a neih bakah rebound vawi 15 latu Jonas Valanciunas a che ṭha bawk. Valanciunas hian playoff china point a neih hnem ber ṭum a tawng a, ani bakah hian CJ McCollum-a'n point 18 a nei bawk.

Inkhel dangah Denver Nuggets chuan Golden State Warriors 126-121 in an hneh, an match hmasa pathuma an chak loh avangin thi leh dam kara leng an ni a, game 4-a an chak ve avangin an la dam hram.

NBA team zingah, match hmasa pathuma chak loh hnuah an khingpuite lehthal thei an la awm ngai lo. Nuggets hian Warriors an lehthal thei a nih chuan NBA sulhnu thar an siam ang.

NBA champion lai Milwaukee Bucks chuan, 3-1 a hma an hruai theih nan Chicago Bulls chu 119-95 in an hneh. Inkhel dangah Miami Heat pawhin Atlanta Hawks 110-86 a hnehin, series-ah 3-1 bawkin hma an hruai.

NBA Playoff
Nimin Inkhel Results
Denver Nuggets 126 - 121 Golden State Warriors
(Warriors hian series-ah 3-1 in hma an hruai)
Miami Heat 110 - 86 Atlanta Hawks
(Miami hian series-ah 3-1 in hma an hruai)
Phoenix Suns 103 - 118 New Orleans Pelicans
(Series-ah team pahnih 2-2 in an inhnehtawk mek)
Milwaukee Bucks 119 - 95 Chicago Bulls
(Series-ah Bucks hian 3-1 in hma an hruai)