Santosh Trophy Qualifier Mizoram hmaah Manipur

Manipur-in Santosh Trophy North East Zone qualifier-a an match hmasa berah Tripura 4-0 in an sawp. Nimin inkhel result avangin Mizoram tan final round lut turin Pathianni tlai dar 1:00-ah Manipur laka point khat hmuh a tawk.

Mizoram hian Polo Ground number 1, Shillong-ah Tripura 6-0 in an hneh a, 2014 Santosh Trophy champion an chak chiang a, inkhel result avangin Tripura-in beisei tur an nei tawh lo. Manipur-in first half thununin goal li lai an khung a, second half-ah erawh mak takin goal a lut lo - Mizoram dinhmun a ṭhat phah.

Thawnthu hlui
January 31, 2014 tlaia Mizo­ram leh Manipur te inkhel kha Lammuala inkhel awm tawha hmuhnawm ber zinga ngaih a ni a, inkhel pawimawh a nih avangin a chinchhiah tlak bawk.

Kum thum liam ta inkhelah hian Mizoram tan final round lut turin chak ngei ngei a ngai a, draw chauh ma­mawh Manipur-in goal venhim ringawt an buaipui avangin hun an khawhral bawk. Lammual khat veka Mizo mipui pungkhawmin minute 80 thleng pawha goal an la hmuh loh avangin an hlauthawng hman hle.

Minute 82-naah R. Lal­danmawia'n goal a khung a, injury time-ah Zico Zoremsanga'n chak nemghehna goal a khung; Mizoram team-in Silliguri-ah champion nomawi chawi zuiin Mizo mipui lawmna a famkim chiah bawk.

Mizoramin kum zawna cham­pion tur khawpin inpuahchahna nei ṭha mah se vanneihna an neih telh loh avangin kum 2015-ah inelna thlengtu Punjab chu semifinal-ah penalty-ah an hneh lo. Hemi ṭum hian Manipur erawhin Assam an hneh loh avangin final round an lut zo lo.

Kum 2016-ah a vawi hnih nan Mizoramin North East qualifier a thleng a, Manipur nen chiah group khatah an awm. Team pahnih hi vawi hnih an inhmachhawn a, first leg-ah goal a lut lo. February 21,2016-a an vawi hnih inkhelhna erawh Malsawmfela chu team pahnih danglamna a ni a, Manipur hi kum thum chhung a zawnin Santosh Trophy final round an lut tawh lo.

Manipur team chu
Manipur-in nimina Tripu­ra 4-0 a an hneh ṭum hian tawn­hriat nei ṭha forward Subhash Singh-a'n goal hnih a khung a, FC Zalen defender Paolenlal Khongsai-a'n goal hnih a khung bawk.

Manipur coach Ratan Kumar Singh-a'n match hmasa berah Lalilt Thapa chu goalkeeper-ah hmangin tlarhnungah James Singh, Waikhom Arun Kumar, Paolenlal Khongsai-te chu captain Govin Singh-a'n a ho a; midfield-ah Imran Khan chu player hmuhnawm niin Konsam Phalguni, Chongtham Kishan leh Lisham Nabachandra te an awm bawk.

Tlar hmaah Subhash leh Prem Singh-te an inkawp a, Manipur squad chhah chhan hi eng dang ni loin I League club an neih loh vang a ni.

Mizoram erawhin I League club Aizawl FC an nei a, player ṭhahnem tak state pawn club-a an khelh bawk avangin tun dinhmunah chuan North East football powerhouse chu Mizoram an ni a tih theih.

Chak tum Mizoram
Mizoram manager Lal­thanzama Vanchhawng chuan, "Tripura-in training pawh an nei tawh lo a, beisei an nei tawh lo. Manipur erawh an ṭha hrim hrim a, first half-a goal li khung turin inkhel an thunun hle. An inkhelh dan thlirin kan intum tawk viau turah ka ngai a, team vannei zawkin final round an lut ang," tiin inchhuang thei an nih loh thu Vanglaini palai a hrilh.

2016 I Day Football best player Zosangliana chu damloh vangin a inlan theih hmel lo a, 2016 MFA Super Cup best keeper Lalmuanawma inhliam vangin a inlan a rinawm loh bawk. Bethlehem Vengthlang forward Lalrammuanpuia leh Ramfangzauva-te chu inhliam vangin an dinhmun a chiang lo.

Mizoram coach Lalsang­zuala Hmar chuan, "Kum 2014 aṭang khan inzir tur a awmin ka hria, Manipur khan draw chiah an mamawh a, goal venhim an tum a, an chak lo. Pathiannia Manipur kan hmachhawn hunah chuan chak tumin kan khel ang," tiin point khata an lungawi loh thu a sawi.

Pathianni tlai inkhel thlir lawkin Mizoram manager Zama chuan, "Shillong-a Mizo awmte chawlh hmanga Mizoram lama haw an tam avangin Tripura nena kan inkhelh ṭumin entu an ṭhahnem tawk lo. Manipur nen erawh entu an tam theih kan beisei a, kan mamawh bawk. Shillong-a Mizo awmte inkhel en turin kan sawm a, en thei lo pawh ṭawngṭainaa min ṭawiawm turin kan sawm a ni," tiin Vanglaini palai a hrilh.

Mizoram player-te hi naupang te te an ni a, Santosh Trophy-a khel tawh pawh panga chiah an awm - player 15-te hi an vawi khat khelhna a ni a; nimahsela 'team' ṭha tak an ni.