Aizawl FC bul ṭanna East Bengal
Tun season I League match hmasa ber chu vawiin tlai dar 4:30 hian East Bengal leh Aizawl FC ten an khel dawn. Barasat Stadium, Kolkata-a inkhel hi Ten 2-ah a en theih ang.
AFC hmaah David
Aizawl FC-in I League an khelh hmasak ber ṭuma player langsar chu captain David Lalrinmuana a ni a, Zemabawk North tlangval hi tun season-ah erawh East Bengal player a ni tawh.
Kolkata club midfielder David chuan, "AFC hi thinlungah a la cham reng a, club hlui hmachhawn hi ka châk lo. Amaherawhchu professional player kan nih angin khelhna hun min pe a nih chuan theihtawp ka chhuah ang," tiin Vanglaini palai hnenah a sawi.
East Bengal-ah hian Lalrindika Ralte leh Robert Lalthlamuana te an awm bawk a, Indian Super League-a Atletico de Kolkata champion puitu player pahnih hi inhliam vangin an inlan theih a rinawm loh.
Ningani zanah Trinidadian striker Willis Plaza'n Kolkata a thleng a, nimin zing lama East Bengal training a zawm nghal. AFC an hmachhawn hunah manager Trevor Morgan-a chhawr theih turin foreigner pathum Haitian midfieder Wedson Anselme, Ugandan defender Ivan Bukenya leh forward Willis te an awm tihna a ni.
Intawnna hmasa
Season liam ta khan AFC leh East Bengal hi vawi hnih an inhmachhawn a, Kolkata-ah mualneitu 2-0 in an chak a, Aizawl-ah mikhual 3-2 in an chak leh bawk. RG Stadium-a an inkhelh ṭum hian Aizawl FC-in 2-0 in hma an hruai a, East Bengal-in an lehthal.
Hemi ṭum hian AFC defender Emma Chigozie leh Lalramchullova te chu hnawhchhuah an ni a, referee thutluknaah mipui an lungawi lo. Aizawl FC ṭantu Mizo mipuite dan phal baka an chet avangin Mizo club-in pawisa an chawi phah hial.
Aizawl FC thar
Mizo club zinga I League khel awmchhun Aizawl FC hi MPL-a an khelh dan aṭanga kan thlir a nih chuan Mizo mipui tana chhuan tham an tling lo. MPL5 semifinal-ah AFC hi Chanmari FC lakah an mualpho a, hei vang hian I League che ṭha tur khawpin an ṭha tawk lo.
I League khel turin Aizawl FC an insiam ṭha a, coach Khalid Jamil an lalut. Mumbai FC coach hlui Khalid hian player ṭha a seng lut a, East Bengal an hneh a nih pawhin result mak a ni lo ang.
AFC hian MPL-a an chhawr loh Mizo player ṭha Zohmingliana Ralte, Lalruatthara, T. Lalnunpuia, R. Laldanmawia leh H. Lalmuankima te an lalut a, Chanmari FC laka an mualpho ṭum aiin an ṭha tawh zawk.
MPL-ah foreigner an la fuh lo a, tunah erawh India rama tawnhriat nei sa, midfield leh defence-a hman kawp thei Eze Kingsley Obumneme bakah forward pahnih Alfred Jaryan leh Kamo Stephane Bayi te an lalut a, hming langsar ber erawh Syrian midfielder Mahmoud Amnah a ni. Amaherawhchu Sporting Goa midfielder hlui Amnah hi match hmasa berah a inlan thei dawn lo.
Aizawl FC-in state pawn aṭangin goalkeeper Albino Gomes, right back Ashutosh Mehta leh winger Jayesh Rane te an neih belh bawk a, I League-ah Mizo club an zahpuiawm loh.
Mizo club coach Khalid Jamil chuan, "East Bengal kan hneh theih lohna chhan tur a awm lo a, result ṭha tak beisei ang," tiin Vanglaini palai a hrilh tawh a, I League match hmasa bera Kolkata club lian East Bengal leh AFC te inkhel hi a hmuhnawm ang.