CSL sum sen danah China sorkar a nghing
China sorkar hnuaia General Administration of Sport chuan Chinese Super League sum sen dan chu uchuak lutuk nia an hriat thu sawiin CSL club-te sum sen tur chin chu bituk sak an tum thu an puang.
Chinese Super League hian January transfer-ah player langsar tak tak Chelsea midfielder Oscar, Argentine striker Carlos Tevez leh Zenit Saint Petersburg midfielder Axel Witsel te CSL lamah an lalut leh der tawh a, world class player lalut tura an tawktarh ber chu sum a ni.
General Administration of Sport of China chuan, "Club ho sum hman dan leh chevel hi uluk zawkin kan zirchiang ang a, sum an thehchhuah dan pawh hi bithliah chin neihsak a ṭul a ni," tiin ram pawn player a sum sen tam ringawt chu hmasawnna tur niin an ngai lo.
Nikum December khan Cristiano Ronaldo agent Jorge Mendes chuan Portuguese forward hi Chinese club an hming tarlan loh chuan pound maktaduai 250 a lakchhuah tumin Real Madrid an dawr thu a sawi a, kum khatah pound maktaduai 85 hlawhtir an inhuam a ni.