Real tan Ronaldo a lo kir dawn
Kum 2017 a Real Madrid-in an match hmasa bera Sevilla 3-0 a an hnehna inkhelah Cristiano Ronaldo chu chawlh hahdamtir a nih avangin a inlan lo a, vawiin tlai dar 5:30-a an league match hmasa ber Granada nen an khelh hunah erawh Zinedine Zidane chuan a player chhuanvawr hi a khelhtir tur thu a sawi.
French manager chuan, "Inrinnia kan inkhelh hunah chuan Cristiano hi ka chawlh hahdamtir tawh lo ang. Granada a hmachhawn ang a, kan hmabak season a match khelh tur tam takah a inlan ang. Player pakhat hi inkhel thlak danglam turin an ṭha tawk thei a, player danglam bik a nih avangin Cristiano hian chu chu a thlentir fo a ni," tiin a forward chu amah chauh pawha inkhel thlak danglam turin a ṭha tawkah a ngai.
Ballon d'Or chawimawina dawng hlim Ronaldo hian tun season-ah league match 11 khelin goal sawm a khung tawh a, inelna hrang hrangah match 19 khelin goal 16 a khung tawh bawk - Granada tan Zidane-a thusawi hi thil hriat nuam a ni lo tawp ang.
Barca hnungzuiin
Real Madrid-in match 38 chhung ngam loh an tawng tawh lo a, kum 2015/16 a Barcelona-in Luis Enrique hnuaia match 39 tlawm hmel hmu loa an kaltluan nihrual turin zanina tlawm loh an tan a tawk - Real hmachhawn tur hi Granada an nih avangin Zidane-a naute tan hna harsa niin a lang lo.
Spanish club ropui hian Granada an hmachhawn vawi 10-ah vawi kua zet hnehna an chang a, vawi khat chiah a tlawm zawkah an ṭang. April 2015 a team pahnih an inhmachhawn ṭum khan Real hian 9-1 zetin Granada hi an sawp a, zaninah pawh an hmaa record siam theih thlir chungin mikhual lakah ṭhat chhuah an tum lo tawp ang.
James a inlan dawn?
Colombia captain James Rodriguez-a'n Real bench a luahlum ṭhin avangin January transfer-ah a hmalam hun a tih chian tur thu a lo sawi tawh a, mah se kum 2017 a an match hmasa berah inkhel bul ṭantir niin goal hnih a khung - kum 25 a upa attacking midfielder hian Real-ah beiseina thar neiin Santiago Bernabeu a chhuahsan loh tur thu a sawi.
James-a thusawi vangin khawthlang media ten zawhna an nei nghal a, zaninah Colombian midfielder hian Granada a hmachhawn nghal ang em tih hi zawhna langsar chu a ni. Mahse, Ronaldo khelh tur thu sawi chiangtu Zidane-a'n James a dinhmun sawi chiang duh loin, "James khan game ṭha tak a khel a, player dang pawhin chu chu an ti vek a ni," a ti a, Monaco player hlui hian zaninah hmun a chang lo a nih chuan Real a a cham tur thu a lo sawi tawh a zuk leh a nih pawn a mak lo ang.
Atletico inlan zan
Real Madrid inlan zanah an hmelma Atletico Madrid pawh an inlan dawn a, Diego Simeone-a naute hian zanin dar 8:45-ah Eibar an lenchilh ang. Atletico hi La Liga a vawk lal len Real Madrid leh Barcelona elpha ber tura ngaih ni mah se tun season-ah beisei an la phak lo a, league match 16 khelh tawhah anni aia khel tlem zawk hmahruaitu Real an phak lohna chu point kua zet a ni tawh.
Mahse, Atletico hian insiamṭhat an tum tih pholangin kumthara an match hmasa ber Copa del Rey last 16 first leg a Las Palmas an lenchilhin 2-0 in hnehna an chang a, 2016 kum tawp lama beisei phak lo Antoine Griezmann chuan goal khat khunga kum bul a ṭan bawk avangin tun hi an phur vanglai tak a ni dawn - Eibar tan mikhual an chakawm loh ang.