FA Cup Champion lai Man United inlan dawn

Zanin hian FA Cup third round khelh chhunzawm a ni dawn a, nomawi kawl mektu Manchester United chuan dar 6:00 hian championship club Reading FC an lo mikhual ang.

Premier League champion tum zinga mi Arsenal-in dar 11:00-ah Preston North End an lenchilh ang a; Pathianni zanah Chelsea, Liverpool leh Tottenham Hotspur te an inlan bawk dawn a ni.

Wembley lam hawiin...

Nikum May thla khan United hian Wembley Stadium-ah Crystal Palace chu extra time-ah 2-1 a hnehin champion nomawi an chawi a, zanin hi tun season-a he inelna bika an inlan vawi khatna tur a ni. United hian hnehna an chang a nih chuan inelna hrang hrangah a zawna match riat chhung an chakna tur a ni ang.

Jose Mourinho-a'n an match hnuhnung bera West Ham an hneh

ṭumin Middlesbrough hnehtu player panga ngawt a siksawi. United hian Thawhlehni zanah League Cup semifinal khel turin Hull City an mikhual dawn a, kartawpah league lama an elpui Liverpool an hmachhawn zui dawn bawk - Mourinho tan player siksawi thiam a ṭul hle ang.

United hian defender pawimawh Eric Bailly chu Africa Cup of Nations a khelh dawn avangin an chhawr thei dawn lo a, midfielder Michael Carrick a dam tawh thung. Captain Wayne Rooney chuan Ningani khan team training a zawm leh tawh bawk.

Team pahnih inkhel tur player-te ai maha ngaihven hlawh zawk chu Old Trafford-a United legend Jaap Stam a kir tur hi a ni. Dutch defender rorum tak hian kum thum chhung United tan a khelh chhungin Champions League, Premier League leh FA Cup nomawi a chawi vek. Nikum June thla khan Stam hi Reading manager atan ruat a ni a, tunah chuan a club hlui a hmachhawn dawn.

United treble champion puitu Stam chuan, "United hi ka la ngaihven reng a, ka la hmangaih bawk. Tunah chuan hmelma kan ni rih dawn a, a boruak a danglam tawh ang," a ti. Inkhel boruak a sang ang tih a chiang. Man United hian Reading nen an intawn hnuhnung vawi 19-ah ṭum khat chiah chak loh an nei.

Sanchez tel loin

Arsenal manager Arsena Wenger chuan Preston North End an lenchilh hunah tun season-a an club tana goal khung thei ber Alexis Sanchez a kheh tir loh tur thu a sawi.

Wenger chuan, "Alexis hi ka khelhtir a nih pawhin zawhna ka dawng a nga, a khel lo a nih pawhin zawhna chu ka dawng tho ang. Ka player thlan chungchangah ruahmanna ka nei lawk vek tawh a, tun dinhmunah chuan Sanchez hian chawlh a mamawh a ni. Hmun hla tak taka kan zin fo bakah kan inkhel hnem em em a, player khel tam deuhte hi chuan rilru leh taksa chawlh an mamawh," tiin a sawi.

Chile international Sanchez hian tun season-ah inelna hrang hrangah match 26 a khelh aṭangin goal 15 a khung tawh a, an match hnuhnung bera Bournemouth nen 3-3 a an inhnehtawk ṭumin goal khat a khung.

Insiamṭhat tum Blues

Antonio Conte kaihhruaina hnuaiah Chelsea-in a zawnin league match 13 chhung zet hnehna an chang thei a, Arsenal record (vawi 14 chak) record tluk theihna hun ṭha nei mah se Tottenham khelmualah 2-0 in an tlawm. Italian manager hian Spurs an hneh lo chu insiamṭhat nan an hman tur thu a sawi.

Chelsea hian Pathianni zan dar 8:30-ah Peterborough an lo mikhual dawn. FA Cup vawi sarih champion tawh Blues hian he inelnaa nomawi an chawi hnuhnung ber chu kum 2012 daih tawh kha a ni a, Conte hnuaia indin thar London club hian third round-a chetsual an duh lo ang.

Blues manager Conte chuan, "Thla nga chhung lekin kan team-ah hmasawnna hmuh tur tam tak a awm a, tunah chuan kan chak lohna aṭanga insiamṭhain hmalam kan pan leh tawh ang," a ti.

Reds fiahna

Premier League pahnihna Liverpool-in Pathianni zan dar 7:00-ah League Two club Plymouth Argyle an mikhual dawn. Jurgen Klopp-a naute hi chak tura rinkai ni mah se Reds hian league-ah Manchester United leh Chelsea an hmachhawn zui dawn; League Cup semifinal-ah Southampton nen an inkhelh dawn avangin player siksawi thiam a pawimawh bik hle ang.

Khawvela knock out tournament upa berah hian Liverpool hi vawi sarih an champion tawh a, tun hnai kum 10 chhung zet erawh nomawi an chawi tawh lo.

Liverpool hian an playmaker Philippe Coutinho an la chhawr thei lo a, defender Joel Matip pawhin training pangngai a la zawm lo bawk. Senegal international forward Sadio Mane chu Africa Cup of Nations khela a thang bo mek bawk avangin Reds hian an player naupang leh league lama an chhawr rim loh deuh te an khelhtir a nih pawhnin a mak lo ang.