I League-ah Mizoram player an ṭhahnem

Vawiinah India ram club inelna sang ber I League khelh ṭan a ni dawn a, team 10 inelna league a Mizoram player awm zat chu 53 niin team khata Mizoram player kawl hnem ber Aizawl FC-in 23 ngawt an kawl.

Champion lai Bengaluru FC chuan zanin dar 7:00-ah Shillong Lajong mikhualin an match hmasa ber an khel dawn a, club pahnih hi Mizoram player tamna an ni.

Bangalore club-in an neih sa goalkeeper Lalthuammawia Ralte, defender Lalchhuanmawia Fanai, midfielder Beikhokhei Beingaichho leh Malsawmzuala, striker Daniel Lalhlimpuia bakah Mumbai City aṭangin Sena Ralte an lak belh a; Barcelona assistant manager hlui Albert Roca enkawl team tan hian hliam vangin Thuama leh Chhuantea ten season bul an ṭan thei dawn lo.

Thangboi Singto enkawl Shillong Lajong-in ṭum dang ang bawkin Mizoram player an kawl hnem a, Jacob Lalrawngbawla, Zodingliana, Joseph Lalfak-zuala, Lalrammuana, Isaac Vanmalsawma leh Sa­muel Lalmuanpuia te chuan Meghalaya club jersey nen I League an hmachhawn ang.

Sum hmanga I League khel tura inlei tling Chennai City-in Mizoram Premier League lam hawiin an mit an len a, Tamil Nadu coach hlui Robin Charles Raja enkawl team hian MPL5 best player Malsawmfela leh a unaupa Bethlehem Vengthlang FC forward Lalnunmawia te lalutin, Chhinga Veng FC trio Joseph Lalnunpuia, defender Ro­nald Zothanzama leh striker Lal­khawpuimawia te an nei bawk.

Irish coach Dave Rogers enkawl DSK Shivajians-in Mizo­ram player 10 ngawt an kawl. Ricky Lallawmawma, Lallianzuala Chhangte, Jerry Mawihmingthanga, Jerry Lalrinzuala, K. Lalṭhathanga, Lalnunsiama, Sairuatkima, Vanlalremkima, Lalawmpuia leh Lalhriatpuia Changte te chuan Pune khaw club kawr hain I League an hmachhawn ang.

I League hnuhnung ber tura champion ngei tum East Bengal-in Lalrindika Ralte, David Lalrinmuana leh Robert Lalthlamuana kawlin, an hmelma kumhlun Mohun Bagan-in Mizoram player an kawl awm chhun chu AIFF player of the year Jeje Lalpekhlua a ni.

Mumbai FC coach thar Santosh Kashyap-a'n Royal Wahingdoh lama a lo enkawl tawh Lalchhawnkima thiamna a la theihnghilh lo a, Delhi Dynamos defender hlui Kim Kima hi Maharashtra club lamah hruai lutin Mizoram player awm chhun a ni ang.

I League club zingah kum hnih hnua lo kir leh Churchill Brothers leh club thar Minerva Punjab FC chu Mizoram player awm lohna awmchhun an ni.