Player pakua Bilbao ngam lotu Barca
Barcelona tan kum 2017 bul an ṭan danah lawmna tur a awm lo - Luis Enrique-a'n a player chhuanvawr pathum 'MSN' tia hminglem an pek Lionel Messi, Luis Suarez leh Neymar hruai chungin Athletic Bilbao a lenchilh a, mualneitu team-in red card vanga player pahnih chan chungin 2-1 in hnehna an chang.
Copa del Rey last 16 first leg inkhelah hian Bilbao tan Aritz Aduriz chuan minute 25-na lekah goal hmahruai a khung a, minute thum pawh a liam hmain Inaki Williams chuan a chhunzawm ve lehnghal bawk.
Barca tan Messi-a'n minute 52-naah freekick aṭangin goal khat sut ve mah se minute 70 hnua attacking midfielder Raul Garcia leh defensive midfielder Ander Iturraspe hnawhchhuah an nih hnuah pawh Barca-in goal dang an khung thei tawh lo a, injury time a Messi-a'n post a pet per chu Catalan club-in an ui khawp ang.
Barcelona hian kumina an league match hmasa ber chu Pathianni zan dar 1:15-ah an khel dawn a, khualmuala Villarreal an lenchilh hunah hian result ṭha zawk an beisei dawn.
Enrique thukhawchang
Barca boss Luis Enrique chuan, "Inkhel ṭantir lamah kan talbuai avangin kan tuar a ni. Second half-ah erawh kan insiamṭha a, hei aia result ṭha zawk hlawhchhuah hi kan phuin ka hria," tiin an result chuan an khelh dan a hril loh thu a sawi.
Spanish manager chuan inkhel a la tawp loh thu sawi nghalin, "Tuna kan tana pawimawh ber chu harsa dawn mah se second leg a goal chhuah loh a ni a, Nou Camp-ah fan-te ṭawiawmna nen he chona huphurhawm tak hi kan hmachhawn dawn a ni," tiin quarterfinal luh ngei a tum.
Referee vang?
Spanish striker Aduriz-a'n Barca centre back Samuel Umtiti chu a hrawkah a nghawk lui a, French defender laka Aduriz chet dan enin kum 35 a upa striker hi hnawhchhuah ngei tur niin lang mah se referee Fernandez Borbalan-a'n card a phawrh lo a, Neymar chuan chawlhlawk hman a nih hmain penalty hlawhchhuah theihna hun ṭha nei mah se Borbalan hian a ham lo bawk.
Fans leh player tam takin referee an dem a, Barca boss Enrique erawh an chak loh chhanah referee a dem duh lo. Spanish manager chuan, "Chawlhlawkah khan referee thutlukna avanga kan lungawi lohna chu hmuh theihin a awm ngei a, mah se kan hriatreng tur chu referee nih hi hna hautak leh hahthlak a ni tih hi a ni," tiin referee tan tihsual palh neih a awl thu a sawi.