Warriors chak puitu Saina

Ace Indian shuttler Sai­na Nehwa chuan Premier Bad­minton League season 3-a a vawi khat nan hnehna a chang. Awadhe Warriors star Saina hian Nitchaon Jindapol chu trump match-ah 14-12, 11-7 a hnehin a team chu Delhi Acers lakah 6-1 in hnehna a chanpui.

Ningani zana Babu Bana­rasi Das Indoor Stadium-a in­khelah league match hmasa lama vawi hnih chak lo tawh Saina a chesual nawn tawh lo a, inkhel pawimawh bikah nuamsa takin hnehna a chang - Thai shut­tler Jindapol vawi sarih a hma­chhawn tawhah a hneh fai vek.

Inkhel dangah Delhi Acers lam hian trump match an thlang sual a, chak tura beisei Son Wan Ho chu Wing Ki Vincent Wong lakah 11-8, 11-6 in a tlawm. Mipa singles-ah Warriors tan Indian shuttler Kidambi Srikanth chuan Jan O Jorgensen 11-9, 11-13, 11-9 in a hneh ve bawk.

Kum 26-a upa Saina chuan, "A tir lamah khan point thumin ka hnufual nghal a, ṭan ka lak tak tak hnuah ka pawt thla leh thei. Ka match hmasa pahnihah hnehna chang lo mah ila tunah chuan beiseina thar ka nei leh tawh," a ti.

Awadhe Warriors hian match hnih khelh tawhah point 11 hmuin hmahruaitu an ni mek a, champion lai Delhi Acers erawh match thum an kheh aṭanga point khat chiah an la neih avangin table mawngphahah awmin semifinal luh beiseina an nei tawh lo.

Zanin hian inkhel pakhat a awm leh dawn a; Bengaluru Blasters leh Hyderabad Hunters an inhmachhawn ang.

Inkhel Results
Awadhe Warriors 6 - 1 Delhi Acers
V. Shem Goh & bt Vladimir Ivanov & 11-4, 11-4
Markis Kido Akshay Dewalkar
(T) Saina Nehwal bt Nitchaon Jindapol 14-12, 11-7
S. Kidambi bt Jon O Jorgensen 11-9, 11-13, 11-9
Savitree Amitrapal & bt Ivanov & 12-10, 11-5
Bodin Isara G. Jwala
Wing Ki Vincent Wong bt (T)Son Wan Ho 11-8, 11-6