Liverpool hmaah beiseina neitu Villarreal
Premier League club Liverpool-in club dang la tih theih loh 'quadruple' champion nih an tum a, League Cup-ah an champion tawh a, nomawi pathum an la bak.
Villarreal-in an club chanchina nomawi lian tham hmasa ber chu 2020-21 season khan an chawi a, Europa League champion an ni - tun season-ah Champions League semifinal an lut zui a, nomawi ropui zawk chawi leh an tum.
Liverpool leh Villarreal ten an club chanchina la thleng ngai lo thlen tir tumin ke an pen a, mahse, a tu emaw zawk zawk chuan an duhthusam hi an mangṭha a ṭul dawn - zaninah an intawng dawn tlat.
Champions League semifinal first leg-ah zanin dar 12:30 hian team pahnih an intawng dawn a, Anfield-ah Villarreal an leng dawn - inkhel a hmuhnawm loh ring suh.
Liverpool an dam
Tun season-a Liverpool vanneihna tak chu player inhliam an nei meuh lo chu a ni a, zanin inlan turah pawh Roberto Firmino chu he thu buatsaih thlenga dinhmun chiang lo awmchhun a ni a, player dang an inlan vek dawn.
Reds-in match an khel hautak zawn hle a, match hnuhnung pangaah Manchester City (2-2), Benfica (3-3), City (3-2), Manchester United (4-0) leh Everton (2-0) an hmachhawn a, an tlawm miah lo!
Hei hian Liverpool thiamzia leh squad chhahzia a pholang, tiin a sawi theih a, Spanish club Villarreal tan Anfield meuha hnehna chang tur chuan thapui thawha chhuah a ngai dawn.
Chutihrual chuan Spanish club hian semifinal lut turin Juventus leh Bayern Munich an pet chhuak tih hriat telsak a ṭha a, Man United, Atalanta leh Young Boys awmna group aṭanga tlang an ni bawk - Anfield-a zam chhe tur an ni lo.
Tu nge inlan ang?
Mahni muala khel tur Reds-in mikhual dawngsawng turin tute nge an lo inlan tir ang? tih chu zawhna awm thei a ni a, Klopp-a'n fixture hautak avanga player a siksawi nasat avangin rinthiam pawh a harsa hle.
Goalkeeper-ah chuan chuh rual lohin Alisson chu ding chiang tura ngaih a ni a, tlarhnung ven leh goal nawr pui hna thawk kawp turin Trent Alexander-Arnold leh Andy Robertson an awm ang a, a laiah Virgil van Dijk kawppui turin Joel Matip aiah Ibrahima Konate chu lut tura ngaih a ni.
Villarreal goal nawr na chhu chat turin Fabinho a awm ang a, season duhawm tak hmangtu midfielder Thiago Alcantara chu ball sem turin a lut ang a, game pawimawhah chuan captain Jordan Henderson a lut ṭhin tih hriat a ṭha bawk.
Mohamed Salah leh Sadio Mane chu tlarhmaah lut chiang an ni ang a, Klopp-a'n Diogo Jota aia Luis Diaz luhtir a thlang a nih pawhin a awm lo hran lo ang.
Beiseina neitu
Kum 2018 chhiarpuia a lan danin Villarreal khawpuiah mipui 50,577 an awm a, khawpui lian a ni lo - mahse, chu khuaa an club chuan Champions League semifinal an khel dawn a, Villarreal fans tam tak lung a leng ang.
Villarreal hian 2005-06 season khan Champions League semifinal an lo khel tawh a, Juan Román Riquelme, Juan Pablo Sorín, Marcos Senna leh Diego Forlán te ho vanglai kha a ni a, an hmuhnawm ṭhin hle.
Champions League semifinal an khelh hmasak zawkah hian Arsenal ngam loin final an lut zo lo a, a vawi hnih nana semifinal an luhnaah English club bawk an tawng leh dawn ta.
'King of the Cups' hming lem an pek Unai Emery enkawlna hnuaiah Villarreal-in 2005-06 season-a an vanduaina ang kha thlen nawntir an duh dawn lo a, Spanish club tan tun aia hun ṭha zawk hi a awm tawh kher lo mai thei.
Villarreal an ṭha
Liverpool boss Jurgen Klopp-a'n an tum tur a hre chiang. German coach chuan, "Cup competition-a hlawhtling ber coach an kawl a, Emery hian a hnathawh a hrechiang a ni," tiin a lo sawi tawh a, fimkhur a ṭul thu a sawi bawk.
Mahse, Villarreal hian an striker ṭha mi Gerard Moreno chu hliam vangin an chhawr theih loh hmel a, Spain international hi a inlan lo a nih ngat chuan Reds tlarhnung tan hna a hautak lo sawt tura ngaih a ni.
Reds tana khel tawh Alberto Moreno pawh hliam vangin a inlan thei dawn lo chiang a, hetihlai hian Bayern Munich an hneh hnua inlan leh tawh lo Francis Coquelin-a'n training a zawm leh tawh.Villarreal tan tlarhmaah tun season-a goal 16 khung tawh Arnaut Danjuma chu innghahna tur a ni ang.
Midfield laiah tawnhriat nei ṭha Dani Parejo leh Étienne Capoue an rintlak a, centre back-ah Spain tana vawi 58 inlan tawh Raúl Albiol leh Spain international Pau Torres te an inkawp leh ang a, Salah leh a ṭhianten awlsam taka sut hawn theihah an ngai a nih chuan an tisual ang - a awih lo tan Juventus leh Bayern tlarhma a zawh theih!
Inlan tura beisei
Liverpool (4-3-3):
Alisson; Alexander-Arnold, Konate, Van Dijk, Robertson; Henderson, Fabinho, Thiago; Salah, Mane, Diaz
Hrem: Awm lo
Hliam: Firmino
Villarreal (4-3-1-2):
Rulli; Foyth, Albiol, Torres, Estupinan; Parejo, Coquelin, Capoue; Lo Celso; Chukwueze, Danjuma
Hrem: Awm lo
Hliam: Gerard Moreno, Alberto Moreno
UCL - Semifinal
First Leg
Nizan Inkhel (Result kan hre hman lo)
Manchester City 12:30 AM Real Madrid
April 27, Nilaini - Zanin
Liverpool 12:30 AM Villarreal
Second Leg
May 3, Thawhlehni Zan
Villarreal 12:30 AM Liverpool
May 4, Nilaini Zan
Real Madrid 12:30 AM Manchester City
Juventus leh Bayern hneh chuan semifinal khelh an phu tihna a ni mai. Unai Emery hi cup inelnaah chuan roreltu a ni. - Jurgen Klopp, Liverpool manager
Villarreal hian team ṭha tak tak an hneh a, team ṭha tak an nih avangin hmachhawn an awlsam dawn lo. Kan theihna zawng zawng hlan tura kan inpeih a ngai a, final kan luh theih hram ka beisei. - Jordan Henderson, Liverpool captain
Semifinal ṭha tak khelh kan tum ang a, chutiang chuan chance kan nei ve thei ang. Liverpool hi team ṭha tak an ni a, Benfica pawh an ni tho - semifinal hmuhnawm tak a ni ang. - Unai Emery, Villarreal coach
A pawimawh ber chu coach a ni a, kan coach hi a ṭhain game a thlir thiam ṭhin hle. Ani hoa semifinal kan lut hi a ropui a, club leh ama tan pawh mang ram thleng dik ang mai a ni. Liverpool hi champion tura rin kai zinga mi an ni a, a awlsam lo ang. Mahse, theihtawp kan chhuah dawn a, semifinal kan luh chhan pholan kan duh. - Samuel Chukwueze, Villarreal forward