Central YMA Cricket khelh ṭan a ni ta

Central YMA leh Cricket Association of Mizoram ṭangkawpin an buatsaih Mizorama cricket inelna lian 11th Inter Branch YMA Cricket Tournament chu nimin khan khelmual pathum Durtlang, Mualpui leh Ramhlun Sports Complex-ah khelh ṭan a ni.

Tun ṭum inelnaah hian CYMA hnuaia branch 45 an tel a, Aizawl khaw pawn aṭangin branch panga Champhai Venglai, New Serchhip Bazar, Serchhip Hmar Veng, Meisatla (Siaha) leh Lunglei Lunglawn te an tel.

Meisatla, Siaha chuan hnehna changin nimin khan Zotlang an hneh. Aizawl khaw pawn branch dang Champhai Venglai, New Serchhip Bazar Veng, Serchhip Hmar Veng leh Lunglei Lunglawn te erawh an vanduai thung.

Inkhela chak lo zawk hian CYMA hnuaia inelnaa tih ṭhin angin ngaihhruina an dawng zel a, tun ṭumah hian suahdur leh leg guard te pek an ni.

Tun ṭum inelna hi kum 2018 hnua inelna neih leh hmasak ber a ni a, inelna hnuhnung bera team quarterfinalist chuan last 16 aṭangin an khel ṭan dawn. Chung team pariatte chu champion lai Ramhlun Venglai leh finalist Durtlang bakah Zemabawk, Luangmual, Chaltlang, Ramthar Veng, Chanmari leh Armed Veng te an ni.