Aizawl FC an la him lo

I League relegation stage-ah Aizawl FC chuan table mawngphaha awm Kenkre an hneh lo a, dinhmun hima awm turin an nghah a la ngai. Kalyani Stadium-a inkhelah Kenkre tan Ranjeet Pandre-a'n first injury time-ah goal awmchhun a khung a, Mizo club-in a chhanletna an nei lo.

Kenkre hian league round pangngaiah point hnih chiah an hmu a, relegation stage khelh hnuah harhtharna an chang. Maharashtra club hian Aizawl FC an hneh hma hian Sudeva Delhi chu 3-0 in an sawp.

I League aṭangin team pakhat an relegate dawn a, relegation stage khel team paruk zingah Indian Arrows an relegate thei lo. Kenkre hi an chak chho zel a nih chuan boruak a hot dawn.

Mizo club-in point 15 an hmu a; Indian Arrows, Sudeva Delhi, Trau leh Real Kashmir ten point 13 vek an hmu. Kenkre hian point riat chauh la hmu mah se an match hnuhnung pahnih thlir chuan en liam chi an ni tawh lo.