MPL Under 18 - Team tinin point an hmu vek

Mizoram Football Association leh Mizoram Youth Commission buatsaih Mizoram Premier League Under 18 league round chu nimin khan khelh zawh a ni. Point la hmu lo pahnih Chawnpui FC leh FC Bethlehem te 2-2 in an inhnehtawk a, team tinin point an hmu vek.

Inkhel dangah Chanmari FC-in Mizoram Police 5-0 in an sawp a, semifinal-a inhmachhawn tur a chiang ta bawk. Final khel tur zawnna hi April 28, Ningani hian Lammualah khelh a ni ang.

Point khat ve ve
Tun season MPL Under 18-ah Chawnpui FC leh FC Bethlehem te an nem deuh a, match hmasa parukah an chak lo vek. Chutihrualin Chawnpui leh Bethlehem te hi an goal khung zat leh an goal chhuah zat a inang vek a, an intluk tawk hle. An pahnih inkhela chak lo zawk hi table mawngphaha awm tur an ni.

Chawnpui tan Joshua ZD Lalruatfela a che ṭha a, minute 16 chhungin goal hnih a khung. FC Bethlehem lamin goal hnih an chhuah hnuah an beidawng lo a, first half-ah vek Lalramchhana leh Lalrinfela te hmangin siphurh an sut zo. Second half-ah goal a lut tawh lo a, 2-2 in an inhnethawk.

Goal nga
Chanmari FC leh Mizoram Police ten semifinal an lut tawh a, inkhel result erawhin table a la tidanglam thei thung. Police hian hnehna an chang a nih chuan semifinal-ah Chanmari an hmachhawn thei dawn a, Chanmari an chak a nih erawh chuan Police hian Chhinga Veng an hmachhawn thung dawn.

Chanmari erawh hnehna chang pawh ni se head to head-ah Chhinga Veng an hneh loh avangin pakhatna dinhmun an luah thei tawh lo a, chutichung chuan tha an thlah lo. First half-ah Jacob Lalhmangaiha leh Lalremruata te hmangin goal an khung a, second half-ah Lalrothlanga'n goal hnih a khung bakah Remruatkima'n goal khat a khung bawk.

Intum tur chu
Chhinga Veng leh Chanmari FC ten point 18 ve ve an hmu a, head to head-a ṭha zawk Chhingcows chu hmahruaitu an ni. Coach Lalremruata enkawl Chhinga Veng hian April 28, Ningani chhun dar 12:30-ah palina Mizoram Police an hmachhawn ang.

Semifinal hmasa zawk hi chawhma dar 10:00-ah khelh a ni dawn a, Chanmari FC leh FC Venghnuai te an inkhel dawn. Team pahnih hi an inkhelh hmasak zawkah Chanmari 3-2 in an chungnung a, semifinal-ah coach Rindika Hmar kaihhruai Venghnuaiin coach Rochhingpuia enkawl Chanmari barakhaih an tum ang.