Nadal hnung zuitu Alcaraz

Carlos Alcaraz chuan amah ang bawka Spanish tlangval Rafael Nadal hnung a zui. ATP world ranking chhuak tharah, kum 18 mi Alcaraz hi pakuana a ni, ani ang kum zat a nih lai hian Nadal chu ranking sang zual 10 zingah a lo lang phak tawh bawk.

Ranking neih san hi a awlsam lo, Nadal (2005) hnuah chuan Alcaraz hi world number 10 china awm thei naupang ber a ni, kum 18 mi chauh a la nih avangin hmabak a nei êng, ranking hmasa nena khaikhin chuan a hmaa player awm pahnih a kal khum.

Barcelona Open champion Alcaraz chuan, "Ka tan chuan thil mak leh lawmawm a ni, tun ang kumah hetiang dinhmun ka thleng phak ang tih hi ka suangtuah ngai lo. Duhthusam a thleng dik a, thawhrim rah chu a hlu," a ti.

Novak Djokovic chu a chung berah a la awm chhunzawm. Serbia Open final-ah chak zo lo mah se, amah hnaih bertu Daniil Medvedev aiin point 82 zetin an la sang zawk. Tun hnaia inkhel tam lo Nadal chu palinaah a la awm bawk.

Hliam vanga chawl mek Roger Federer chu 41-na a ni. Swiss star hi kuminah a la inkhel lo, tunah hian training a nei ṭan ve leh tawh. Grass court season hman ngei a tum a, inelna lian Wimbledon chu a hmathlir pawimawh ber a ni ang.