Chiellini a chawl dawn

Italy defender Giorgio Chiellini chuan international football a chawlhsan dawn. Ram tana a match hnuhnung ber atan June thla hian Wembley Stadium-ah Argentina a hmachhawn ang.

Kum 37 mi Chiellini hi a vanglai chuan khawvel defender ṭha berte zinga mi a ni phak, ram tan match 116 khel tawhin Euro 2020-ah khan a champion pui, kumina khelh tur Qatar World Cup atan erawh an tling zo lo.

Chiellini chuan, "Wembley Stadium-a kan inkhelh zawhah ka chawl ang, ka tan chuan Italy jersey ka hak hnuhnun ber a ni dawn," a ti. Euro champion leh Copa America champion te a vawi khat nan an intum dawn a ni.

Serie A defender of the year vawi thum ni thei Chiellini hi Azzurri tan 2004 aṭangin a inlan ṭan a, tlarhnung laia ban rinawm niin Euro 2012 pawh khan pahnihna dinhmun an lo luah tawh. Nikuma an champion ṭum khan player pawimawh niin, captain armband hrengtu a ni phak.

Ram tana inlan hnem lamah pawh pangana a ni hial - Andrea Pirlo nen an inzat. Anni aia inlan tam te chu Daniele de Rossi (117), Paolo Maldini (126), Fabio Cannavaro (136) leh Gianluigi Buffon (176) te chauh an ni.