Nets sawpin Celtics an tlang

Boston Celtics chu Eastern Conference semifinal lut hmasa ber an ni. Celtics hian nimin zing khan Brooklyn Nets chu 116-112 in an hneh a, best of seven series khelh tura match hmasa paliah an chak vek!

New York khawpuia inkhelah Celtics hi a tir aṭangin an chungnung a, hniam zawk nih lai an nei lo. Jayson Tatum-a'n point 29 a nei a, point 22 neitu Jaylen Brown a che ṭha bawk. Nets tana Kevin Durant (39 points) thil tihin awmzia a nei phak lo.

Conference semifinal-ah chuan Milwaukee Bucks leh Chicago Bulls inkhela chak zawk an hmachhawn leh ang. NBA champion Bucks hian 3-1 in series-ah hma an hruai mek a, an tlang zawk ngei a rinawm.

Hnehna an chan theih nana thawhhlawk tak Tatum chuan, "Kan khingpuite ṭhatzia kan hria, talent nei ṭha tak tak awmkhawm an ni. 4-0 in kan chak ngei mai, mahse match zawng zawng kha a hautak vek.

"Chutihrualin inrintawkna kan nei sang a, match khat atan vawi khat theihtawp kan chhuah zel kha a tawk, chu chuan a tawpah rah ṭha a chhuah," a ti a, thawhhona ṭha chu an chak chhan a nih thu a sawi ve bawk.

Nimin zing inkhel dangah Toronto Raptors an la inhamtang zel. Raptors hian Philadelphia 76ers chu 103-88 in an hneh a, series-ah erawh 76ers hian 3-2 in hma an hruai, team pahnih tan tlang turin kawng a la inhawng zau hle.

Western Conference lamah Dallas Mavericks chuan 3-2 a hma an hruaina ni turin, an khingpui Utah Jazz chu 102-77 in an hneh ve bawk. Hnehna an chan theih nan Luka Doncic-a'n point 33 a neih bakah, rebound vawi 13 a la bawk.

NBA Playoff
Nimin Inkhel Results
Boston Celtics 116 - 112 Brooklyn Nets
(Boston Celtics hian series 4-0 in an la)
Toronto Raptors 103 - 88 Philadelphia 76ers
(76ers hian series-ah 3-2 in hma an hruai)
Utah Jazz 77 - 102 Dallas Mavericks
(Dallas Mavericks hian series-ah 3-2 in hma an hruai)