Leeds-in hmun him lam an pan

Thawhṭanni zan Premier League inkhelah Leeds United leh Crystal Palace te goal awm loin an inhnehtawk. Jesse Marsch hote hian match 33 aṭangin point 34 an hmu a, relegation zone-a awm Everton aiin point ngain an hmu tam zawk.

Leeds an ṭang tluan
Selhurst Park Stadium-ah mualneitu Crystal Palace an chungnung a, Leeds United lakah chak ngei tumin an nawr na hle. Jean-Philippe Mateta-a'n Leeds keeper Illan Meslier a hmachhawn hnuah goal-ah pet mah se goal-a a luh hmain an pet chhuahsak hman.

French striker Mateta hmang bawkin Palace-in chance ṭha an nei a, Conor Gallagher ke aṭanga ball fing chhuak chu dinglamah Jordan Ayew-a'n a chang. Ayew hian ṭha zetin cross lut mah se Mateta-a'n goal-ah a chantir thei lo.

First half-ah goal a lut lo a, second half-ah pawh a danglam lo. Palace bawkin chance ṭha an ngah a, Leeds United tlarhnung tan Wilfried Zaha a hnawksak hle. Zaha hian ṭum khat aia tam goal-ah pet mah se keeper Meslier-a'n a dansak vek.

Chelsea aṭanga loan hmang an hawh Gallagher pawhin box pawn chiah aṭangin a volley a, crossbar chungah chiah a kal. Tla thei dinhmuna ding Leeds United an ṭang tluan a, point khat hlu tak an hlawh chhuak.

Zaha an sawi zui
Leeds United tan England international Kalvin Phillips a rawn kir a, minute 90 chhunga langsar ber erawh Zaha a ni. Inkhelh banah Phillips chuan, "Thla li dawn hnua bul ka ṭan leh hmasak ber a ni a, ka khel leh thei hi ka lawm. Chutihrualin point thum kan duh a, goal kan khung theih loh avangin goal venhim a pawimawh.

"Zaha kha player ṭha a ni a, kan veng ṭha hle. Referee pawhin kan tihtluk nasat thu a sawi a, amaherawhchu dik taka sawi chuan a tlu der nasa hle," tiin Zaha chungchang a sawi.

Crystal Palace manager Patrick Vieira chuan, "Zaha kha an chelh theih nan an foul nasa em em a, an tum pawh niin ka hria. Rilru fim taka a khel tluan thei kha ka lawm. Khatianga foul nasat kha a vawi khat tawnna a ni lo," tiin a sawi.

An la him lo
Leeds United hi 16-naah an awm mek a, Palace lakah point hlawh chhuak mah se an la him lo. Jesse Marsch hote hian point 34 an hmu a, Toffees aiin point ngain hmu tam mah se Frank Lampard hote hi match khatin an khel tlem zawk.

Leeds boss Jesse Marsch chuan, "Kan khelh ṭhat ber zan a ni lo a, chutihrualin khel ṭha lo chunga point kan hlawh chhuak thei kha result ṭhaah kan ngai. Tun aiin goal kan bawh nat a ngai a, chutihrualin goal chhuah loh erawh a lawmawm," tiin a sawi.

April 30, Inrinni zan hian Leeds United-in champion lai leh hmahruaitu Manchester City an mikhual dawn. Marsch chuan, "Kan chak emaw chak lo emaw pressure lian tak hi chu a awm reng. Manchester City phei chu an danglam bik. Pep Guardiola hote kan hmachhawn hunah huaisen takin kan khel dawn a, amaherawhchu City hi an ṭha tih ka hria. Khawvela team ṭha ber an ni," tiin a sawi.