Chennai tan Rayudu chet ṭhat a tawk lo

Indian Premier League-ah Punjab Kings chuan Thawhṭanni zan khan Chennai Super Kings chu 11 runs-in an hneh.

Kings hian bat hmasain 187/4 runs an siam a, Shikhar Dhawan-a'n thi loin 88 runs a siam. Chennai tan Ambati Rayudu (78) chet ṭhat zarah over tawp thlengin beiseina nei mah se over 20 chhungin 176/6 chauh an tlin.

Wankhede Stadium-ah Chennai-in vawm hmasak an thlang. Punjab top order Shikhar Dhawan (88*), Bhanuka Rajapaksa (42), Mayank Agarwal (18) leh Liam Livingstone (19) te an che ṭha.

Super Kings erawh opener Ruturaj Gaikwad-a'n 30 runs siam mah se top order lam an che ṭha lo. Chennai tan beiseina a tawpah a ngaih tawh hnuah Rayudu-a'n 'four' vawi sarih leh 'six' vawi ruk zet rawn vuain 78 runs a siam.

Rayudu a thih pawh hian MS Dhoni a rawn luh avangin Chennai ṭantute thawm a la ṭha hle. Dhoni hian six leh four vawi khat ve ve vaw hman mah se Mumbai Indians laka a chet ṭhat a chhunzawm thei ta bik lo. Super Kings-in 176/6 runs an siam a, 11 runs-in Punjab an chak.