Juve tan UCL a chiang hnai

Champions League khel turin Juventus an tling ngei dawn niin a lang ta. Thawhṭan zan Serie A inkhelah Old Lady hian hun tawp dawna Moise Kean-a goal hmangin Sassuolo chu 2-1 in an hneh.

Old Lady hian league match 34 aṭanga point 66 hmuin palina an ni chhunzawm a, khelh zat inangah pangana AS Roma aiin point riatin an sang fal tawh, khelh hmabak match li chauh an nei tawh a ni.

Allianz Stadium-ah mikhual Sassuolo lamin goal an nei hmasa, minute 38-naah Giacomo Raspadori chuan keeper Wojciech Szczesny paltlangin goal hmahruai a khung a, an goal neih erawh an venghim rei lo.

Juve-in chawlhlawk hmain Paulo Dybala hmangin an sut a, chakna goal erawh an nghah rei a ngai. Hun tawp hma minute hnih chauh awm tawhah Kane chuan an goal hnihna a khung hram, harsa takin point thum an hlawh chhuak.

Juventus coach Massimiliano Allegri chuan, "Hma kan sawn zel, chutih rualin tun aia ṭha zawk khan kan la khel thei," a ti. Nipui bazar lo thlen hunah chuan player pahnih vel lak belh an ngaih tur thu a sawi bawk a ni.

Kum 2022 bikah Juventus hian, si an phurh hmasak hnuah vawi li hnehna an chang let tawh. Kumina point an hmuh zinga 12 chu harsa taka an hlawh chhuah tihna a ni a, season bul ṭan fuh lo mah se hma chu an sawn zel.