City 4-3 Real: A la tawp lo!
Manchester City leh Real Madrid ten Etihad Stadium-ah ennawm ropui an lantir a, Champions League semifinal first leg-ah hian inkhel hmuhnawma tel tur ang chu a fun kim hle. Player ṭha chungchuang Kevin de Bruyne leh Karim Benzema ten an theihna a pholang a, coach ṭha Pep Guardiola leh Carlo Ancelotti kut hnu hmuh tur a awm a, goal sarih ngawt a lut.
Thawhlehni zan inkhelah Man City-in 4-3 in Real Madrid an hneh a, English club tan De Bruyne, Gabriel Jesus, Phil Foden leh Bernardo Silva ten goal an khung. Los Blancos tan Benzema-a'n goal hnih a khung bakah Vinicius Jr a pet goal bawk. A lawmawm lai erawh a la tawp lo - May 4, Nilaini zan hian Santiago Bernabeu-ah an inkhel leh dawn.
City nge nge
Man City-in Europe-a record nei ṭha ber Real Madrid an hmachhawn chungin ṭan phat aṭangin mikhual team hi an nawr tawm nghal. Pep-a'n a naute awmze nei takin pressure a pek tir a, player tinin an tih tur an hre chiang hle.
English club-in an huaisen rah an seng a, a hmawr bawk turin an thiam ve hrim hrim bawk. Riyad Mahrez-a'n ball a thiamzia a pholang a, De Bruyne-a'n game a chhiar thiam piah lamah a huaisen tih a pholang. Belgian midfielder hian Dani Carvajal-a'n ball pet tuma a ke a khai chungin a tauh ngam.
Real an buai a, City erawh an phur thung. Jesus-a'n goal khung turin fing tak maia Alaba a vir khum a, Brazilian forward hian inrintawkna a neih san zia a pholang.
City hian goal hnih dang khung thei tur an ni a, Mahrez-a'n Foden pe loin goal-ah pet a thlang - goal zawnah a pet lo. KDB erawhin Foden a pe thung a, English midfielder pawhin goal zawnah a pet bik lo.
Second half-ah City an vannei tawk lo a, Mahrez-a'n goal ban a pet per bakah hemi per hi Foden-a'n goal-a ding Carvajal zawnah a pet. Foden a vanduai reng ta bik lo a, Fernandinho cross chu goal-ah a tauh lut ta tho.
Bernardo Silva-a'n referee Istvan Kovacs-a'n advantage a pek chu thiam taka hmangin a pet goal. Player thiam ringawt ni loin thluak ṭha bik danglamna a lang. Man City-in goal li an khung a, inkhel an thunun tel a, inkhel hmuhnawm tak pho chhuak mah se an famkim bik lo.
Benzema Show
Man City khelh ṭhat zanah Karim Benzema a langsar leh ta ber tho. French striker hian Ferland Mendy cross chu goal-ah a chantir a, goal class tak a nih bakah Real beiseina siamtu a ni.
Benzema-a'n goal a khung hian 2-1 a ni a, 3-1 a nih hnuah Vinicius Jr-a'n halfway line aṭanga la tlangin goal ṭha a khung. Amaherawhchu 3-2 a nih hnuah City 4-2 in hma an hruai leh a, Man City-in chhantu an mamawh.
Toni Kross-a freekick petin Aymeric Laporte kut a per avangin Real-in penalty an hmu. Benzema a rawn ding chhuak hi awm ve rengah ngaih ni mah se French forward hian kartawpa Osasuna an hneh ṭumin penalty ṭum hnih a hlah.
Pressure na takin Benzema thin phu a tih ran phah lo - Real striker hian thutlukna huaisen siamin panenka hmangin penalty a pet. Benzema ball pet chu goal laiah muang raihin a kul lut a, penalty satliah a ni lo. He penalty hian Real beiseina a siam a, Bernabeu-a City mikhual turin an inpeih tih a lang bawk.
Engtin zel?
Man City-in hrem vangin Joao Cancelo leh Kyle Walker te an chhawr thei lo a, tlarhnung a pawp phah. Right back hna chelhtu John Stones chu inhliam vangin Fernandinho a rawn lut a, Brazilian midfielder hian assist ṭha nei mah se Vini Jr goal khungah mawh a phur.
Guardiola erawhin Fernandinho hi a hna ṭha taka thawh avangin a fak thung. Second leg-ah erawh Man City an kim dawn. Chutihrualin inzirna tur an nei. PSG-in inkhel thunun chungin Real Madrid hi an mualah goal khatin an hneh a, Carlo Ancelotti hoten an lehthal - pawr thei an la ni lo.
Real Madrid pawhin defensive midfielder ṭha bik Casemiro chu first leg-ah an chhawr thei lo a, second leg-ah erawh a awm theih tawh beisei a ni. Tlarhnung lama player pawimawh David Alaba chu dam chiang loin a inlan a, Jesus-a goal khungnaah a mawh a phur. Second leg-ah erawh Alaba hi a dam chiang tawh dawn a, Europe-a record nei ṭha ber Real Madrid hmachhawn tura Santiago Bernabeu lenluh hi thil châkawm a ni lo.
UCL - Semifinal
First Leg
April 26, Thawhlehni
Manchester City 4 - 3 Real Madrid
MNC : Kevin de Bruyne 2'; Gabriel Jesus 11'; Phil Foden 53'; Bernardo Silva 74'
RMA : Karim Benzema 33', 82' (P); Vinicius Jr 55'
Nizan Inkhel (Result kan hre hman lo)
Liverpool 12:30 AM Villarreal
Second Leg
May 3, Thawhlehni zan
Villarreal 12:30 AM Liverpool
May 4, Nilaini
Real Madrid 12:30 AM Manchester City
Player inlante
Man. City: Ederson; Stones (Fernandinho 36'), Rúben Dias, Laporte, Zinchenko; De Bruyne, Rodri, Bernardo Silva; Mahrez, Jesus (Sterling 83'), Foden.
Real Madrid: Courtois; Carvajal, Eder Militao, Alaba (Nacho 46'), Mendy; Valverde, Kroos, Modric (Ceballos 79'); Rodrygo (Camavinga 70'), Benzema, Vinícius Junior (Asensio 88'.)
Goal sarih chu
2' De Bruyne
Riyad Mahrez-a'n mual dinglam aṭangin a khalh lut a, Real Madrid player-te'n box chhunga a khalh luhna tur veng mah se a cross-na tur erawh an veng lo. Algerian winger hian ṭha zetin a cross a, fing taka tlan lut Kevin de Bruyne-a'n huaisen takin a tauh lut.
11' Jesus
Goal hmahruaitu khungtu De Bruyne box chhunga awm Gabriel Jesus a pe a, Brazilian forward hian Real defender David Alaba chu vir khumin chiang takin a pet goal.
22' Benzema
Real wing back Ferland Mendy-a'n vei lam aṭangin ṭha zetin a cross a, Karim Benzema-a'n Oleksandr Zinchenko venna kar aṭangin goal kilah tak a dah. French striker-in a class zia a pholang.
53' Foden
Midfielder Fernandinho chu inhliam John Stones aiah right back-ah a rawn awm a, Brazilian player hian dinglam aṭanga ṭha zeta cross-in Foden-a'n a tauh lut.
55' Vinicius Jr
Brazlian winger Vinicius Jr-a'n a class zia a pholang. Mual vei lamah Mendy pass chu Vini Jr hian a lirh tlang tir a, Fernandinho kap karah ball hi lutin Brazilian winger hian halfway line aṭangin a um lut. Vini Jr hian inringtawk takin a khalh lut a, goal ṭha tak a khung.
74' Bernardo Silva
Box pawn chiahah Oleksandr Zinchenko chu Toni Kroos-a'n a ti tlu a, Real player-te'n foul a ham turah an ngaih laiin Bernardo Silva-a'n fing taka lalutin kawh zetin goal kilah tak a pet lut. Keeper Thibaut Courtois-a'n a en liam.
82' (P) Benzema
Toni Kroos-a freekick pet luh chu City defender Ameyric Laporte-a'n Benzema tauh khalh a tum a, ball-in a kut a per. Referee-in penalty a pe a, Benzema-a'n huaisen takin goal laiah zawi takin a pet a, Ederson-a'n dive chungin ball-in goal a lut lai hi a thlir.
Kan khel ṭha chung-chuang
Eng result pawh nei ila, 2-0 emaw 3-0 emaw pawh ni se Bernabeu kan tlawh hunah khelh ṭhat a la ngai tho. Second half-a kan khelh anga kan khel a nih chuan kan chak thei lo ang. A bak zawnga kan khelh anga kan khelh chuan kan chak ang. Inkhelh hmuhnawm tak chhawpchhuah kan duh a, player-te ka hrilh tur pawh a ni. Thildang an ngaihtuah a thiang lo.
Footballer ka nih lai leh manager ka nih hnu thlengin Bernabeu-a result ṭha neih tur chuan chet ṭhat a ngai a, chuti lo chu a chak theih loh. Champions League ang inelna sangah chuan hetiang hun harsa paltlang hi a ṭul a ni.
Football chu football a ni a, result pawh result a ni. Kan khelh dan kha a ṭha chungchuang a, tumahin khel chhia min ti lo ang. Chutihrualin final thleng tur chuan kan khelh ṭhat a ngai. A tawpah chuan kan chance insiamte goal-a kan chantir a ṭul. - Pep Guardiola, Manchester City manager
Kan chak loh dan khan inkhel a ti nung
Ka thlirnaah chuan bul kan ṭan ṭha lo a, goal hnih kan chhuah dan kha a nem mah mah. Man City khan an theihna an pholang a, keini pawhin kan chhanglet ṭha a, beiseina kan la nei zel.
Goal ṭha zawka kan venhim a ṭul tih a chiang. Ball nen kan ṭha a, chance pawh kan insiam. Chak lo mah ila kan chak loh dan khan Bernabeu-a kan inkhel tur a tinung. Goal venhim kan ngaih pawimawh a ngai a, second leg-ah harsatna kan siam ngei ka ring. - Carlo Ancelotti, Real Madrid manager