MPL Under 18 semifinal Chanmari vs Venghnuai; Chhinga Veng vs Police

Mizoram Football Association leh Mizoram Youth Commission buatsaih Mizoram Premier League Under 18 semifinal chu vawiin hian khelh a ni dawn. Tlai dar 5:00-ah Chanmari FC leh FC Venghnuai te an inkhel ang a, zanin dar 7:30-ah Chhinga Veng leh Mizoram Police te an inkhel leh ang.

Chanmari vs Venghnuai
MPL Under 18 hi inelna ṭantirh khan Under 17 tih ṭhin a ni a, inelna hmasa pahnihah Chanmari FC hi an champion. Hemi hnu hian nomawi an la chawi leh lo a, tun ṭumah hian Chanmari fapa rangkachak tiha sawi ṭhin Rochhingpuia'n a enkawl a, beisei an nei sang hle.

Chutihrualin an khingpui FC Venghnuai enkawltu Lalrindika Hmar hi MPL-a FC Venghnuai enkawltu tho a ni a, coach Rindika hian nikum kum tawp khan Mizoram hmeichhe team semifinal thlenpuiin tawnhriat a neih belh leh tawh.

Team pahni hi an inkhel hmasak ṭumin Chanmari 3-2 in an chak a, an inthlauhna a tam lo. Chanmari coach Chhinga chuan, "Training-na hun kan ngah lo a, inbuatsaihna hun ṭha zawk chu nei ila player ṭha zawk an chhuah theih ka beisei. Chutihrualin chhuanlam siam erawh ka tum lo a, team tin hun neih dan a inang vek. Chanmari chuan game mawi kan khel a, khua a ṭhat chuan game ṭha tak kan pho chhuak thei ang," tiin inringtawk takin Vanglaini a hrilh.

Venghnuai coach Rindika pawh hi 'long ball' aia 'passing game' ngaisang tho an ni a, an inkhel tur hi en a châkawm. Semifinal lut dang zawng vawi hnih ṭheuh an champion tawh lain Venghnuai erawhin nomawi an la chawi ve lo a, MPL U18 history-a an hming chuan tir an duh a ni chuan Chanmari hi an hneh a ṭul.

Rindika Hmar chuan, "Karkhat chiah practice na hun kan neih avangin kan game ah pawh duhthusam loh na tam tak kan nei, chuti chung a semi final kan lut hi a lawmawm. Chanmari lakah 1st eleven player pathum inhliam vangin kan chhawr thei dawn lo a. Mahse chhuanlam a tling lo, squad a awm tu te pawh hi kan ring tawk.

"League-a kan hneh loh dan en khan team hun nei tam zawk ni mahse an chungnung bik lo tih a lang. Fimkhur tak si in, kan game pangngai attacking football kan khel ang, veng mipuite ṭawiawmna kan ngen e," tiin Vanglaini a hrilh.

Coach ṭha inbeihna
Mizoram football-ah hian langsar lo a, coach ṭha an awm. Zanin hian coach ṭha pahnih chu an inlan dawn a, an hming chu H. Lalremruata leh R. Lalramhluna te an ni.

Remruata hian Chhinga Veng a enkawl a, Ramhluna hian Mizoram Police a enkawl thung. Coach pahni hian MPL Under 18 final vawi thum ve ve an khel tawh a, vawi hnih ve ve an champion tawh.

MPL Under 18 bakah hian Aizawl DFA hnuaia first division leh second division-ah te an inhmachhawn tawh ṭhin. Remruata enkawl Chhinga Veng hi league round-ah pakhatna ni a, hmahruaitu niin hneh loh pakhat chauh nei mah se an hneh loh hi Police an ni.

Mizo player ṭha R. Laldanmawia te tun dinhmun an thlenna chhan Police assistant coach Hluna chuan, "Group match hnuhnung berah Chanmari 5-0 in kan hneh lo a, player ṭha leh inhliam te kan dah ṭhat vang a ni pakhat.

"Semifinal-ah chuan kan kim dawn. Zep tur a awm lo a, Chanmari leh Chhinga Veng hi chu team ṭha an ni. Mahse league round-ah Chhinga Veng hi kan hneh," tiin Vanglaini a hrilh. Mizoram Police hi coach Laltuakliana leh assistant coach Hluna ten an enkawl a ni.

Chhinga Veng hian pahnihna Chanmari aiin goal difference-ah chhe zawk mah se an elpui ber hi an hneh avangin league round hmahruaitu an ni thung. Coach Remruata chuan, "Semifinal chinah chuan engpawh thleng thei a ni. Tun ṭumah hian midang aiin trial kan ko tlai a, player ṭha hlang la loin player thar kan chher a, champion ngei erawh kan duh," tiin Vanglaini a hrilh.

Semifinal
April 28, Ningani
Chanmari FC 5:00 PM FC Venghnuai
Chhinga Veng 7:30 PM Mizoram Police