Old Trafford-ah team talbuai pahnih
Buaina hrang hrangin a hual vel club pahnih - Manchester United leh Chelsea chu zanin dar 12:15 hian an intawng dawn. Old Trafford-a inkhel tur hi Premier League a ni a, chak tur zawk rinthiam harsa khawpin tun hnaiah an pahnih hian an che ṭha tawk lo.
"Chelsea lakah Ralf Rangnick-a'n Manchester United a kaihruai thei lo mai thei..." tih chu nimin tlaia Man United website-a inziak a ni a, an khingpui tur Blues pawh a neitu Roman Abramovich an hrek avanga buai lai an ni ve bawk.
An dinhmun
Premier League table-ah Chelsea hi pathumna an ni, match 32 aṭangin point 65 an hmu - Champions League chu an khelh ngei a rinawm, chutihrualin Arsenal nen an inkarah point nga chauh a awm, pathumna ni turin chetsual a la thiang bik lo.
Man United erawh point 54 nen paruknaah an awm, zanina an khingpui tur Blues an phak lohna chu point 11 zet a ni a, match hnihin an khel hnem zui! Palina ni phak tur pawhin kawng a hautak tawh, an chak a nih erawh chuan UCL ticket beiseina an la nei ang.
UCL khelh phak leh phak loh hian United-ah nghawng a nei dawn, an thiampuipa Cristiano Ronaldo hma lam hun thlenga hril thei tur a nih avangin palina nih phak hram an tum dawn, chutihrualin Thomas Tuchel-a naute laka point thum hmuh a awlsam dawn lo.
United buaina
Erik ten Hag-a'n season thar aṭangin Man United a enkawl dawn tih a chiang tawh, manager laikawk Rangnick dinhmun chian loh chhan hi tarlan ni lo mah se, boruak ṭha tak hnuaiah a awm lo tih erawh a chiang, tun hnai khan Jesse Lingard chuan team boruak ṭhat lo thu hi a lo sawi tawh.
Paul Pogba-a'n United tana a hun a hmang zo tawha ngaih a ni a, midfielder Scott McTominay erawh Arsenal lakah bulṭantu a ni thei tawh. Fred, Edinson Cavani leh Luke Shaw te erawh hliam vangin an la chawl mek, zaninah an inlan a rinawm lo.
Tlarhnung hi an buaina lian a ni. Gunners lakah Harry Maguire chu bench lama dah a ni a, captain tel lo hian Raphael Varane leh Victor Lindelof te an inkawp, a phui phah chuang lo, anni pathum zingah tute pahnih nge lut ang tih rin thiam a harsa.
Buaina nghawng
Chelsea pawh buaina nei lo an ni bik lo. Defender pawimawh Antonio Rudiger a chhuak dawn tih a chiang tawh a, hliam vanga Ben Chilwell a chawlh mek bakah Cesar Azpilicueta leh Andreas Christensen te chu season tawpa chhuak thei dinhmunah an ding.
London club hi hrek lai an nih miau avangin player contract leh fans thlengin a nghawng a, a tir lamah buai phah lo mah se tun hnaiah a nghawng a lang chho mek. Tuchel tan player fuih phur a awlsam lo mai thei, a hna a hautak dawn.
Hei erawh hria ila, German manager hian hun harsa karah pawh Chelsea hi result ṭha a lo neih pui tawh ṭhin. Tun ṭumah pawh hian Old Trafford bika an sulhnu ṭha lo tak thaibo an tum ngamin a rinawm, chumi tur chuan player pawh an nei ṭha tawk.
Ngaihnawm
• Chelsea hian league match khela Old Trafford an tlawh hnuhnung pariatah chak an nei lo, vawi thum tlawmin ṭum nga an inhnehtawk.
• Premier League match bika an intawn hnuhnung pariatah, anmahni mual leh khualmualah Man United hian Chelsea lakah tlawm an nei lo.
• Chelsea nen league match an khelh hnuhnung panga zinga paliah United hian goal an chhuah lo a ni.
• Ningani zan bikah team pahnih hi an intawnna hmasa ber a ni dawn.
• Old Trafford-ah Man United hian an league match hnuhnung pasarihah tlawm an nei lo, vawi li chakin ṭum thum an inhnehtawk.