Wimbledon khel thei tur Djokovic

Novak Djokovic chuan Wimbledon 2022 a khel thei dawn, a nomawi humhim turin grass court inelna lian berah a inlan thei dawn tihna a ni. Australian Open khel thei lo Novak tan chanchin lawmawm bik a ni ang.

Wimbledon buatsaihtu lam hian, hripui laka invenna la lo player tan pawh khelh theih a nih tur thu an sawi. Serbian star hian Covid-19 vaccine a la duh lo a, hei vang hian kumina Grand Slam hmasa ber Australian Open pawh kha a khelh theih loh phah ṭhak.

All England Lawn Tennis Club chief executive Sally Bolton chuan, "US sorkar lamin hripui leng vanga inkaihhruaina a siam uluk taka en a ni a, hetah hian ram dang aṭanga England pan tur tan vaccine lak ngei ngei a ngai lem lo.

"Chuvangin keini lam pawhin tournament khel turin vaccine an lak kher a ngai kan ti lo," a ti a, vawi ruk champion tawh Djokovic bakah player ṭhenkhat tan kawng a hawnsak tihna a ni a, vaccine ngaina lo tan thu lawmawm a ni.

Amaherawhchu, Wimbledon hian tun hnai khan Ukraine nena buai Russia leh Bulgarian player-te an tel theih loh tur thu an sawi tawh thung, player langsar tel thei lo tur an awm nual dawn, a famkim thei dawn bik chuang lo.

Wimbledon 2022 hi June 27 aṭanga July 10 chhung hian All England Club-ah khelh a ni ang.