Mumbai City-in chakin Champions League mangṭha

AFC Champions League-a an match hnuhnung berah Mumbai City an chak a, Thawhlehni zan khan Air Force Sports Club chu 1-0 in an hneh.

Inkhela goal awmchhun hi Diego Mauricio khung a ni a, Mumbai club tan ṭum dang ang thoin Lallianzuala Chhangte leh Lalengmawia Ralte (Apuia) te chuan minute 90 an khel tluan.

Mumbai City hian hnehna an chan avangin match ruk aṭangin point sarih an nei a, table-a pahnihna ni chungin Champions League group stage an khar.

Mahse, Indian Super League club hi west region-a pahnihna ti ṭha pathum zingah an tel phak lo a, group stage-a pahnihna ni chungin Champions League an mangṭha.

Beiseina thamral
Nilaini zana team pahnih an intawn hmain Mumbai City-in beisei tur an nei tawh lo tih a chiang sa a, Air Force SC erawh an chak chuan last 16 lut thei dinhmunah an la ding thung.

Iraqi club-in an hmaa inchhawp an hria a, chak ngei tumin an khel - Mumbai City FC goalkeeper Phurba Lachenpa kha inkhelh zawhah a kut a kham viau mai thei!

Mahse, a pawimawh ber goal an khung thei tlat lo a, goal khungtu zawk chu Mumbai an ni. Minute 31-naah rin loh zawk Mumbai tan Mauricio chuan goal a khung a, Iraqi club an hawihai.

Air Force SC lam hian puanthuah tel mai tum loin, theihtawp chhuahin an nawr let a, mahse, a pawimawh ber goal an khung theih loh avangin an tlawm.

Bung thar
Mumbai hian Air Force SC an tawn hmasak zawkah 2-1 in an lo hneh tawh bawk a, AFC Champions League-a Indian club chak hmasa ber record thar an siam.

Indian club-in an vawi hnih intawnnaah hnehna an chang leh a, point sarih ngawt hmu chunga group stage an thlah thei hi Indian club tan chuan bung thar a ni.

Mumbai-in match ruk an khelhah vawi hnih hnehna an chang a, vawi khat draw result an nei a, vawi thum an tlawm - hetih chhung hian an lamah goal riat a lut a, goal 11 an khung thung.

A vawi khat nana Champions League-a an chak ringawt pawh hahipa sawi a nih laiin Mumbai-in point sarih an hlawh thei a, Indian club-ten Asian football an zuam sawt ang.

Mizo hming a mawi
Mumbai-in Lallianzuala Chhangte, Lalengmawia leh Hmingthanmawia an kawl a, Lianzuala leh Apuia hi player rinrawl an ni phak - match ruk an khelhah bul an ṭan vek!

Mizo player pahnih hian bul an ṭan vek a ni satliah lo, Vaivakawn tlangval Apuia phei chuan minute zawng zawng a khel kim vek - Lianzuala hi Al Jazira nena an intawng hnuhnung zawkah an la chhuak tih loh chu a khel kim vek bawk.

Air Force SC lakah hian Lianzuala hian goal khungna chance a nei a, mahse, Lunglei tlangval hun duhawm hi Air Force goalkeeper Mohammed Mejbel chuan lo dangin engmah loah a chantir.

Mizo tlangvalten Asia khawmualpuia football hmanga inelnaah hmun pawimawh an chang phak a, Indian football mai ni lo, Mizoram football tan thu lawmawm a tling.

Inelna kalphung
• AFC Champions League group stage-ah team 39 chin an inel a, group 10-ah team pali zel awmin ṭhen hran an ni a, group J aṭangin Shanghai Port an inhnuhdawh avangin team 40 tur kha 39 an ni.
• Group tina hmahruaitu ṭheuhin last 16 an lut a, pahnihna zinga ti ṭha tan chance a awm bawk - pahnihna te hi west region leh east region-ah ṭhen ve ve an ni a, region pahnih aṭangin pahnihna ti ṭha pathum ve vein last 16 an lut bawk.
• India aṭangin ISL league round winner chu ISL khel turin an tling ṭhin a, season hmasa Champions League-ah khan FC Goa an inlan a, point thum chiah hmuin group stage an mangṭha.
• ISL-ah knockout hmangin champion tur zawn ṭhin a ni a, hei vang hian AFC kalphung zawmin, ISL champion ni loin league round winner zawkin Champions League hi an khel a ni.
• AFC Champions League tih a nih hnuah Indian club tan preliminary round leh playoff aṭangin inkhelh ṭan a ngai ṭhin a, season hmasa aṭang khan group stage aṭangin Indian club-in hmun ruak an nei a, FC Goa chu a khel hmasa ber an ni ta a ni.