Sorkarin AIFF sum dawn a tihniam

India sorkar chuan All India Football Federation (AIFF) sum dawn chu tun hnai kum li chhungin nasa takin a tihniam a, a tihhniamna zat hi 85% a tling hial.

Sorkar chuan AIFF sum dawn an tihhniam chhan hi beisei ang result an neih hleihtheih loh vang niin a sawi a, Indian FA tan inenfiahna tur darthlalang a chhawpsak.

India sorkar hian Annual Calendar of Training and Competitions (ACTC) aṭangin infiamna pawl hrang hrangte sum dawn tur a ruahmansak ṭhin a, AIFF hian 2019-20 financial year (September 2020 thleng - thla 18) ah khan cheng vaibelchhe 30 lai an dawng.

Mahse, sorkar chuan 2020-21 inkarah khan vaibelchhe 10-ah a tihniam a, kuminah phei chuan vaibelchhe nga chiah a pe ta a ni - AIFF hruaitute tan mualphona a tling.

March 29 khan New Delhi-ah ACTC meeting chu neih a lo ni tawh a, he hunah hian AIFF hruaitute chuan tun an sum hmuh zat aia a let thum tala sang an dil a, mahse, sports ministry leh Sports Authority of India (SAI) hotute an hmin zo lo.

Sports secretary Sujata Chaturvedi chuan, "Indian football team result chhe tak avangin AIFF chu grassroot level-a hmasawnna ngaihtuah turin hriattir an ni," tiin ACTC meeting minute-ah a ziak.

Football tan sum thehchhuah a tlem viau lai hian athletics (vaibelchhe 30), badminton, boxing, hockey, shooting (Vbc. 24 ṭheuh), archery (Vbc.15.85) leh weightlifting (Vbc. 11) te chuan an dawng zia viau.

Infiamna zinga dawng hniam pawl dang Tennis (Vbc. 5.5), equestrian (Vbc. 6) leh yachting (Vbc. 5.2) te pawh AIFF hian sum dawn tam lamah a la tluk chuang lo a ni.

Infiamna pawl ho sum pekchhuah tur sawihonaah hian, sorkar official chuan AIFF chu kum naupang lam hmalak pui kawngah a che chak tawk lo tiin an sawi a, age group team tan ram pawn lama fehchhuahna tur an siamsak tawk lo niin an sawi bawk.

Hei bakah hian hmeichhe football chuan ngaihthah a hlawh niin an sawi a, mipa national team ranking leh tun hnaia an result-te pawh sawilan langsar an ni.

Coach Igor Stimac-a enkawlna hnuaia khel India hian World Cup 2022 & Asian Cup 2023 joint qualifying tournament-ah harsa takin Qatar hneh ve bawk mah se beisei an phak lo.

Ranking hniam zawk Bangladesh leh Afghanistan hneh pawh an harsat a, South Asian Football championship-ah champion mah se group stage-ah khawvela ram ranking hniam ber pawl Sri Lanka leh Bangladesh an inhnehtawkpui bawk.

Indian football hian hmabak an nei nual - June thla khian Asian Cup qualifier chu mipa team ten an khel dawn a, October-ah hmeichhe Under-17 tan FIFA U17 World Cup khelh tur a awm dawn bawk - hei hi India-in a thlen tur a ni.

ACTC minute-a a lan danin AIFF chuan September-a neih tur Asian Games-ah quarterfinal thlen an tum a, mahse, Hangzhou, China-a an tel dawn leh dawn loh hi Indian Olympic Association chuan medal an beisei loh avangin an la tihchiansak lo.

Mahse, India sorkar chuan Asian Games zawhah, AIFF hnena an sum pek hi an ennawn leh tur thu an sawi - mahse, nikum lama AIFF sum hmanna en chuan Stimac-a hlawh ringawt hi vaibelchhe 2.39 a tling a, administration leh thil danga a sum hman hi vaibelchhe 9.86 a tling bawk.

Chutihrual chuan AIFF hian FIFA aṭangin kum tin sum a dawng bawk tih hriat tel a ṭha a, a sum hmuhna hnar ber erawh commercial partner Reliance Sports aṭangin a ni thung.