Pro Volleyball League fixture a chhuak

Zothan Autoworks Pro Volleyball League inkhel hmasa berah, inelna hnuhnung bera nomawi inchuhtu Chhinga Veng Spikers leh Durtlang North an intum dawn, hmeichhe lamah Durtlang leh Bungkawn an intawng bawk ang.

Nimin khan Hawla Indoor Stadium Coference Room-ah Mizoram Volleyball Association (MVA) president Er H. Lalzirliana, MLA chuan handbook leh fixture a tlangzarh a, Covid-19 leng vanga kum hnih thulh zawn a nih hnua Pro Volleyball khelh a ni leh tur chu thil lawmawm a ni, a ti.

Tournament hi May 6, Zirtawpni zan aṭangin R. Dengṭhuama Indoor Stadium, Mualpuiah a vawi ngana atan neih ṭan a ni dawn, dar 8:00 aṭangin Chhinga Veng leh Durtlang North an inkhel ang.

Mipa team panga - Chhinga Veng Spikers (2019 champion, champion lai), Durtlang North (2019 pahnihna), Hunthar (2017 leh 2018 champion), Tuichangral (2019 semifinal lut) leh Thutak Nunpuitu Team (2016 pahnihna) an inelna dawn.

Hmeichhe lamah team pali - Durtlang (2019 champion, champion lai), Bungkawn (2019 pahnihna) Bethlehem Vengthlang leh Kanan te an inkhel thung ang.