Forest tan Premier League a hnai

English club record nei ṭha ber pawl Nottingham Forest-in season thara Premier League khelh an tumna chu an chhawm nung ve zel a, Championship match-ah Thawhlehni zan khan Fulham chu 1-0 in an hneh.

Premier League khel tura tling chiang tawh Fulham hian hnehna chang se Championship nomawi chawi thei tawh tur an ni a, mahse, Forest-in an hneh avangin nomawi chawi tura an nghah leh hret a ngai.

Fulham tana centre back Tim Ream leh goalkeeper Marek Rodak inringthul karah Philip Zinckernagel chuan minute 15-naah inkhela goal awmchhun a khung a, Fulham-in a chhanletna tur an nei.

Championship-ah table chung lam pahnih chu automatic-a Premier League khel tur an ni - Fulham an tling tawh a, automatic hmun ruak pakhat a la awm.

Thawhlehni zan inkhel dangah pahnihna ni lai Bournemouth chuan 3-3 in Swansea City an inhnehtawkpui a, point khatah an lungawi - Forest an chak thung a, point thum chiahin Bournemouth hi an thlau ta.

Bournemouth leh Forest hian match thum ve ve chiah khelh tur an la nei a, Championship aṭanga Premier League inkhelh chuh boruak a 'hot' tual tual.

Swansea City khelmualah Cherries (Bournemouth sawina) chak zo lo mah se an comeback erawh a ropui hle - Swansea hian Joel Piroe goal hnih leh Cyrus Christie goal khat hmangin 3-0 in hma an hruai hman.

Mahse, Bournemouth tan Kieffer Moore chuan goal hnih khungin Dominic Solanke chuan penalty a chhuih lut bawk a, a tawpah 3-3 in team pahnih an inhnehtawk daih!

Championship aṭangin Premier League khel tur club pathum an tling ṭhin a, automatic-a a sang pahnih an tlin hnuah pathumna aṭanga paruknaten playoff hmangin hmun ruak pakhat an inchuh leh ṭhin - Bournemouth leh Forest hian playoff chu an khel dawn chiang tawh.