Milan mualah Juventus an tlawm Ronaldo hliahtu Zlatan Ibrahimovic

Italian champion Juventus chu AC Milan mualah 4-2 in an tlawm, inkhelh bana sawi hlawh chu Cristiano Ronaldo ni loin Zlatan Ibrahimovic a ni - kum 38 mi Swede striker hi khelmual pawn leh chhungah a chanchin a la 

ngaihnawm reng.

Thawhlehni zana Juve an chak lo hi pahnihna Lazio tan chanchin ṭha a ni. Mahse, Simone Inzaghi naute hi table mawng lama talbuai lai Lecce lakah 2-1 in an lo tlawm ve bawk a, champion lai Turin club-in point sarihin hma an hruai fal zel.

Kum 2005 Champions League final-ah AC Milan chuan Liverpool lakah chawlhlawk hmain 3-0 in hma an hruai a, nuamsa takin nomawi an chawi tura ngaih a ni. Mahse, second half-ah 'minute ruk' chhungin goal thum an chhuah a, penalty shootout-ah an tlawm zui.

San Siro-ah Juve an tlangnel, Adrien Rabiot (47') leh Cristiano Ronaldo (53') te goal hmangin 2-0 in hma an hruai a, khualmualah nuamsa takin point thum an hlawh chhuak ngei dawn niin a lang hman; a hmunah entu awm thei ni se Milan fans tam tak chu an haw tau tawh ngei ang.

Mahse inkhel a la zo lo; Ibra-a'n minute 62-naah Leonardo Bonucci hand ball vanga an penalty hmuh a khung a, Franck Kessie (66') leh Rafael Leao (67') ten khung zuiin hma an hruai der - goal thum khung tur hian 'minute ruk' chauh hun an mamawh. 

Liverpool-in Champions League 2005 final-a an chunga an thlentir ang kha Milan chuan Juve lakah an thlen lettir thung a, inlehthalna ropui an thlentir. Ibra awmna Milan an phur laklawh, na taka goal nawr chhunzawmin Ante Rebic chuan hun tawp hma minute 10 la awmah chakna goal a khung.

Milan manager Stefano Pioli chuan, "Ka naute khan an theihna zawng zawngin an khel a, point thum kan hmuh theih chhan chu an beidawn duh loh vang a ni. Tun aia ṭha pawhin kan la khel thei, kan kal zel ang," a ti. Ibra chu a kum tam deuh tawh mah se a la rintlak thu a sawi tel bawk.

Ibrahimovic hian tun season Serie A match 11 a khelh aṭangin goal nga a khung a, Juve lakah penalty a chhuih luh bakah an goal hnihna Kessie khung tur a siamsak bawk; inkhel boruak sang leh hau takah a zam ve loh avangin player naupang zawk tan entawn tur a hnutchhiah tel chu a hlutna a ni.

Juve manager Maurizio Sarri chuan, "Minute 60 thlenga kan khelh dan kha chu world class a ni, inkhel kan thunun bakah tlarhnung a phui ṭha hle. A hnu lamah tihsual kan ngah a, goal li ngawt kan chhuah kha a pawi, kan tihsual lai kha a rang thei ang berin kan siamṭha ang," a ti.

Old Lady hi hmahruaitu ni mah se chet fuh loh chang an ngah a, forward Ronaldo goal khung pawh a hlut tur angin a hlu tawk loah a ngaih theih. Portuguese forward hi Juve player zingah kum 1961 hnu lama season khata league goal 25 khung leh thei hmasa ber a ni hial.