Match li atan Dier an hrem

Tottenham midfielder Eric Dier chu Norwich City nen FA Cup-a an inhmachhawn ṭuma amah au eltu fan a kal chilh avangin match li atan hrem a ni a, £40,000 chawitir a ni bawk. 

March 5 khan FA Cup-ah Spurs leh Norwich an inkhel a, penalty shootout hmangin Canaries an chak. Inkhelh banah kum 26 mi Eric Dier hian fan pakhat chu tlan chilhin buaina a siam. Spurs fan nia an sawi hi sawm bikte ṭhutnaa ṭhu a ni a, Dier chu ṭawngkam mawi lo takin a sawisel. Hei hi Dier-a unaupa chuan a hrethiam lo a, an buai. Dier hi inkhelh zawhah fan lam pan hian a tlan chho a, security an inrawlh hman avangin buaina lian tham a chhuak lo. 

Spurs boss Jose Mourinho chuan, "Professional tan chuan tih chi a ni lo a, mahse Dier hi ka dem lo. Kha fan khan Dier a sawisel a, a bul lawkah a chhungte an awm a, Dier-a nau pawh awmin a lawm lo hle. Dier hian a tisual ngei a, mahse hrem tur a ni lo," a ti a, fan hi Spurs fan a nih tak tak a rin loh thu a sawi zui.

Portuguese manager hian a player hi chhan mah se Dier erawhin hremna a pumpelh phah lo. English midfielder hi zanin dar 10:30-a Bournemouth nen an inkhelh tur bakah Arsenal, Newcastle leh Leicester City an hmachhawn hunah a inlan thei dawn lo. Season tawp hmaa an match hnuhnung bera Crystal Palace nen an inkhelh hunah erawh a inlan thei ang. Tottenham hian an match hnuhnung berah Everton 1-0 in an hneh a, hemi ṭum hian captain Hugo Lloris leh Son Heung-min te an intibuai. Amaherawhchu hnehna an chan hnuah erawh team boruak a ṭha a, tla thei dinhmuna ding Bournemouth lakah Jose Mourinho hote hi chak ngei tura ngaih an ni.