Mizoramin final round an lut ta

Kum 2014-a Santosh Trophy champion Mizoramin nomawi lak lêt theihna kawng an zawh zel a, final round lut turin nimin tlai khan Manipur 2-1 in an hneh.

Polo Ground-ah Shillong-a Mizo awmten Mizoram team an ṭawiawm ṭha a, Lalsangzuala Hmar hote tan first half-ah Lalbiakhlua leh Lalrammuanpuia ten goal an khung. Second half-a Manipur tana Imran Khan freekick-in result leh final round lut tur a tidanglam pha lo.

North East aṭangin Mizoram bakah Group A pakhatna Me­gha­laya-in final round an lut bawk.

Mizo hun
Mizoramin Tripura 6-0 a an sawp ṭuma inkhel bul ṭante vek an luhtir a, Manipur lamin Tripura 4-0 a an hneh ṭum aṭangin player pakhat an thlak. Coach Ratan Kumar Singh-a'n keeper Lalit Thapa aiah Loitongbam Bishorjit Singh inkhel bul a ṭantir.

Mizoramin inkhel an thunun nghal a, Lalchhuanawma free­kick pet chu captain Lalrin­chhana'n ṭha takin tauh mah se mak takin Manipur keeper-in a dan sak. Minute 15-naah Lal­muan­zova'n vei lamah defender pahnih a bum a, Chanmari FC winger ball cross ṭha zet chu Mizoram Police winger Biaktea'n a tauh goal.

Sanga hote an chungnun chhunzawm a, Lalrammawia'n keeper chauh a hmachhawn hnuah a ti-goal thei lo a, left back Chhuantea'n a ke dinglamin crossbar a pet per a, referee hmuh danin goalline chhungah a lut lo.

Minute 32-naa ni a, Manipur defender ball tauhchhuah chu Apuia'n yard 30 vel aṭangin a pet nghal a, keeper Loitongbam awmna a fuh tawk loh bawk avangin BVT forward ball pet hi a kum lut nalh hle.

First half-ah Mizoram an chungnung lawr lak a, Manipur lamin goal chance an nei ve lo.

Manipur hun
Second half ṭan aṭanga minute 9-naah Imran Khan-a'n mual dinglam aṭangin freekick aṭangin Manipur tan a goal a khung a, beiseina thar an neih phah bawk. Mizoram ṭan hmun a phet hret a, Manipur chungnung mah se goal hlauh­awm erawh a awm lo.

Mizoramin counter attack hmangin an vaw let ve tho a, Chhuantea ball vawrh luh chu Biaktea'n keeper chiah hmachhawnin a ti-goal lo. Inkhela chungnung zawk Ma­nipur tan Subash Singh-a'n ṭha takin a la tlang a, keeper Sangpuia'n Mizoram a chhanhim. Hemi hnu hian Imran Khan freekick vawrh luh chu a goal mai dawn emaw tih hnuah buai nuai karah goal sirah chiah a kal bawk.

Hun tawp hmain Muanzova cross chu substitute Sangbera'n a tauh hman lo chiah chiah. Mizoramin final round lut turin point khat chiah mamawh mah se Manipur hneh chungin final round an lut.

Mizoramin I League vanga team ṭha ber an tir thei lo chungin I League club nei lo Manipur an hneh.

Eng nge an sawi?
Mizoram manager Lalthan­zama Vanchhawng chuan, "Tripura nena kan inkhelh ṭum ang kha a ni tawh lo a, Ma­nipur nen chuan ṭantu kan nei ṭha takzet a, Shillong Mizote chungah kan lawm hle a ni. MFA-in kan mamawh apiang min tihsak a, kawng engkimah pa nih an tlin avangin an chungah kan lawm," tiin Vanglaini palai a hrilh.

Zama chuan sawi chhun­zawmin, "Kei leh coach Sir Sanga tan tun ṭum hi Santosh Trophy-a team kan vawi khat hruaina a ni a, team sheet en chuan chhuan tham a tling lo. Amaherawhchu kan thawhhohna ṭha tak hi Pathianin mal a sawm a ni. Kan player discipline aṭha em em a, ruih theih thil chu sawi loh meizial takngial avanga buai pawh kan awm lo. Player thawhrim rah kan seng a, final round kan thleng hi kan lawm a ni," tiin a player-te a fak.

Mizoram coach Lalsang­zuala Hmar chuan, "First half-ah inkhel kan thunun a, kawng tinrengah kan chungnung. Halftime-ah chi i lo turin kan infuih a, goal rawn khung ve mah se kan naute an talbuai lo a, an khelh danah a lungawithlak hle a ni," tiin chak phu zawk an nih thu a sawi.

Vawiin hian Mizoram teamin Aizawl an rawn pan ang a, March thlaa khelh tur final round atan an inpuahchah nghal ang.

Tute nge inlan?
Manipur : Loitongbam Bishorjit Singh (GK) (U21) (Lalit Thapa 66'); James Singh Naorem; Govin Singh Moirangthem, Waikhom Arunkumar Singh, Paolenlal Khongsai (U21); Imran Khan; Konsam Phalguni Singh (Lamgoulen (U21) 41'), Chongtham Kishan Singh; Lisham Nabachandra; Singam Subash Singh, Ngathem Prem Singh (U21) (Mangkholen Kigpen (U21) 60').

Mizoram : Liansangpuia (GK) (U21); R. Laldinliana, Lalrinchhana Tochhawng (C); Lalhmunmawia, V. Lal­chhuanawma; Lalmuan­zova (Jesse Laldinpuia 90+2'), Lalrinchhana (U-21), Lalram­tharmawia; Lalbiak­hlua; Lalrammawia, Lalrammuanpuia (Lalsangbera 75').

Thlirna Tawi
GROUP A
January 4, Nilaini
Mizoram 6 - 0 Tripura
MIZ : Lalrammawia 37', 50'; Lalmuanzova 60', 61'; Lalbiakhlua 78', 82'
January 6, Zirtawpni
Tripura 0 - 4 Manipur
January 8, Pathianni
Manipur 1 - 2 Mizoram
MAN : Imran Khan 54'
MIZ : Lalbiakhlua 15'; Lalrammuanpuia 31'
Team Dinhmun
# Team Pld W D L GF GA GD Pts
1 Mizoram 2 2 0 0 8 1 7 6
2 Manipur 2 1 0 1 5 2 3 3
3 Tripura 2 0 0 2 0 10 -10 0
GROUP B
January 5, Ningani
Meghalaya 6 - 0 Arunachal Pradesh
January 7, Inrinni
Assam 0 - 2 Meghalaya
January 9, Thawhṭanni
1:00 PM Arunachal Pradesh Vs Assam
Team Dinhmun
# Team Pld W D L GF GA GD Pts
1 Meghalaya 2 2 0 0 6 0 6 6
2 Assam 1 0 0 1 0 2 -2 0
3 Arunachal Pradesh 1 0 0 1 0 6 -6 0