United-in point tam thei ang ber mamawh - Solskjaer

Manchester United chuan zanin dar 12:45 hian Villa Park-ah Aston Villa an hmachhawn dawn. Ole Gunnar Solskjaer-a hote tan Champions League khel tura point thum hmuh a ṭul ang bawkin Dean Smith-a hote tan Premier League khel zel turin point hmuh a ṭul takzet.

United hian match 16 chhung hneh loh an tawng lo a, Norwegian manager hnuaia chak loh nei loa an kal tluan  rei ber ṭum a ni. Solskjaer chuan, "Match 16 hi Manchester United thil tum nena khaikhin chuan eng tham a la ni lo," tiin an thlen chinah a la lungawi loh thu a sawi.

Man United hi tun dinmunah panganaah an awm a, match nga khelh hmabaka an chak vek chuan season tharah Champions League an khel thei dawn. Solskjaer chuan, "Point tam thei ang ber kan mamawh. Kan khelh hmabaka kan chak vek chuan a sang pali zingah kan tel dawn a, team danga innghat loin kan inhai kuak ve a ngai a ni," tiin a sawi.

United hian Villa bakah Southampton, Crystal Palace, West Ham leh an chung chiaha awm Leicester City te an la hmachhawn dawn a, match zawng zawng a pawimawh vek. An match hnuhnung berah Solskjaer-a hote hian  Bournemouth 5-2 in an sawp a, hemi ṭum hian Solskjaer chuan Cherries defender Nathan Ake bulah 'United-in ke veilama pet centre back' an duh tih a hrilh tih sawi a awm. Amaherawhchu United boss chuan, "Centre Back pasarih ka nei a, thuthang kha khawi aṭanga chhuak nge ka hre lo. Ka neihsa hi an ṭha tawk e," tiin a insawifiah.

Tlarhma lamah United nasa takin hma sawn mah se tlarhnung lam erawh a la phui lo. Khawvela defender manto ber Harry Maguire pawh a fimhlim lo, Cherries nen an inkhelh ṭumin Junior Stanislas-a'n a kap karah a thun sak a, goal a khung zui bawk. Villa nena an inkhel tur hi Maguire tan insiamṭhatna hun ṭha a ni a, a kawppui Victor Lindelof  inhliam vanga a inlan thei lo a nih chuan Eric Bailly a lut ang. Ivorian defender pawh hian Cherries nen handball vangin penalty a chawi a, centre back dang Axel Tuanzebe leh Phil Jones te erawh hliam vangin an la inlan thei lo.

United tlarhma lam erawh lawmna tur hlir a ni thung a, midfield-a Paul Pogba leh Bruno Fernandes te inkawp an hmuhnawm satliah lo a, team tan an ṭangkai tel. Goal khung tura awm player pathum Anthony Martial, Marcus Rashford leh Mason Greenwood ten goal an khung thei vek a, tun hnai bikah United attacking trio zinga a naupang ber Greenwood a khung thei lehzual. Inelna hrang hranga match 10 chhung chak hmel hmu tawh lo Aston Villa tan point khat hlawhchhuah pawh a harsa ang.

Aston Villa boss Dean Smith chuan, "Kan khel chhia a ni lo a, kan phu ang result kan hmu lo. Man United hi kan hneh a nih chuan Premier League khel zel turin beiseina a nung thar dawn. Hemi a nih avang hian United lakah kan fimkhur dawn a, kan kutah engkim a la awm," tiin beiseina la neih thu a sawi a, United ṭantute tan hriat a nuam a ni lo ang. Villa hian Manchester United nena sawi zawm Jack Grealish an kawl a, English midfielder hi zanina inkhel hmuhnawmna belhchhahtu tur a ni.