Sena'n goal ropui a khung

I League champion Bengaluru FC-in an match hmasa berah Shillong Lajong 3-0 in an sawp a, Manipuri forward Udanta Singh-a'n goal hnih a khung bakah Sena Ralte-in goal ropui a khung.

North Mualcheng tlangval Sena hian Benga­luru tana a match hmasa berah inkhel bul a ṭan nghal a, minute 80-naah Mizo tlangval hian box pawn aṭangin a ke vei lamin lei hrulin goal kilah a pet goal - Lajong keeper Vishal Kaith-a'n a ban pha lo.

Inrinni zan inkhelah hian Bengaluru FC Mizo tlangval Daniel Lalhlim­puia'n bul a ṭan bawk a, Serchhip tlangval hian goal khungna hun ṭha a hlah. Shillong Lajong lamah Isacc Vanlalmalsawma'n inkhel bul a ṭan a, Tlung­vel tlangval Jacob Lal­rawng­bawla'n darkar khatna chiahah Aizawl FC midfielder hlui Yuta Kinowaki a rawn thlak bawk.

Bengaluru defender Sena chuan, "I League match hmasa bera club thar tana ka khelh nghal theih avangin ka lawm a, goal kha chu ka vanneih vanga khung ka ni. Khatianga goal khung kha chu ka inbeisei bik lo," tiin Vanglaini palai hnenah a goal ropui chungchang a hrilh.

Bengaluru FC hian January 14, Inrinnni khian Chennai City an mikhual ang a, champion lai hi kawr pawl an hak ṭhin avangin Blues tih hming lem vuah a ni. Inrinni zanah erawh jersey sendâng an ha a, kawr rawng dang an hak chhan hi kar liam taa Bengaluru khawpuia hmeichhe chunga chet mawi lohna thleng an duh lohzia lantirna atana an tih a ni.

Shillong Lajong-in Kolkata-ah January 13 zan hian Mohun Bagan an hmachhawn ang.