Arsenal chhandamtu Giroud

Tun hnai season hnuhnung pathuma vawi hnih champion thei Arsenal-in awlsam takin FA Cup fourth round an lut bik lo. Hun tawp dawna Oliver Giroud goal hmangin Preston North End 2-1 in an hneh hram.

FA Cup third round inkhel dangah Manchester City manager Pep Guarduiola chuan a player ṭha rual hmang chungin West Ham 5-0 in an sawp. Premier League champion Leicester City chuan Everton pet chhuakin Bournemouth leh Stoke City te an tla nghal bawk.

Giroud bawk

Arsene Wenger-a'n Alexis Sanchez a hahchawlhtir a, tlarhmaah striker palian Giroud-a'n inkhel bul a ṭan. Keeper Petr Cech bakah defender rinrawl Hector Bellerin leh Laurent Koscielny ten an khel lo bawk.

Championship club Preston lamin minute sarihna lekah Callum Robinson hmangin goal hmahruai an khung a, an match hnuhnung zawka Bournemouth laka goal thum chhuahtu Gunners an barakaih chiang hle. North London club hian second half ṭantirah Aaron Ramsey hmangin an siphurh an sut a, an chakna goal erawh hun tawp dawn minute 89-na daiha Giroud khung a ni.

France international Giroud hian Arsenal tan inelna hrang hrangah inkhel bul a ṭan hnuhnung pariatah goal khung kim vekin vawi 10 a khung tawh. Season tir lamah a hmel hmuh tur awm mumal lo mah se Gunners tan chandamtu a ni leh ta! Wenger tana thu lawmawm pakhat chu tlarhma lama chhawr turin thla riat zet a chawlh hnuah Danny Welbeck a lo kir leh tawh.

City an lian

Manchester City manager Guardiola-a'n a player thlan dan aṭangin FA Cup-a a match hmasa berah hnehna chan ngei a tum tih a chiang. West Ham khelmualah Yaya Toure, David Silva, Sergio Aguero leh John Stones ten goal khat ṭheuh an khung a, Hammers midfielder Havard Nordtveit chuan an lamah a ti lut bawk.

Manchester City manager Guardiola chuan, "Kan match hnuhnung ber aiin ball kan chang tam tur a ni tih kha kan thil tum a ni a, kan ti hlawhtling. Goal khung turin hun ṭha kan insiam hnem thei a, goal hmasa ber a luh hmain vawi li vel hun ṭha kan nei hman. Inkhel pawimawh tak a ni a, hnehna chang turin kan thawkrim hle," a ti.

Inkhel dang

Premier League club inhmachhawn zingah Everton chu an mikhual Leicester City lakah 2-1 in an tlawm. Goodison Park-a inkhelah mualneitu lam tan Romelu Lukaku chuan goal hmahruai khung mah se Foxes hian substitute Ahmed Musa goal hnih hmangin an chhang let a - kum 29 hnua a vawi khat nan Toffees hi FA Cup fourth round lut zo loin an tla.

Inkhel dangah Hull City manager thar Marco Silva chuan a club a enkawlna hmasa berah Swansea City 2-0 in a hneh. Hull tan November thla hnua a vawi khat nan Abel Hernandez lo kirin Swansea City lakah goal hmahruai a khung nghal a, an goal hnihna hi hun tawp dawna Josh Tymon khung a ni thung.

Kum 2009 hnua a vawi khat nan Stoke City chu third round-ah an tla. Mark Hughes a naute hi an mikhual Wolves lakah 2-0 in an chak lo. Championship club tan hian Helder Costa leh Matt Doherty ten goal an khung a ni.