Murray hnehin Djokovic a champion

Novak Djokovic chuan world number 1 dinhmun chhuhsaktu Andy Murray hnehin season bul ṭan nan Qatar Open title a la.

Inrinni zana final khelh­ah Serbian thiam­puipa Djokovic hian dar­kar hnih leh minute 54 zet an inbeih hnuah Murray chu -3, 5-7, 6-4 in a hneh.

World number 1 Murray hian set hmasa ber a hloh hnuah set hnihna la tur pawhin a thawkrim hle a, match point vawi thum a inchhanhim hnuah set la ve bawk mah se set hnuhnung bera game sarihnaah a service a hloh leh a, a vawi 25 nan Djokovic a hneh lo.

Grand Slam vawi 12 champion tawh Djokovic chuan, "Ka elpui hautak ber hneh chunga nomawi chawi hi ka tan season bul ṭanna duhawm ber a ni. Ani nen hi chuan eng inelnaah pawh inhma­chhawn ila inkhel hautak a ni ziah," tiin a sawi.

Janaury 16 aṭang hian Australian Open khelh ṭan a ni dawn a, he hunah hian Djokovic leh Murray te bawk hi player langsar an ni ang. Nikum final-ah khan an ni pahnih hi inhmachhawnin Djokovic hi a vawi ruk nan a champion.

Kum 29-a upa Murray chuan, "Point ṭhenkhat hmu tur kha chuan thapui thawh a ngai zel a, best of three match ni mah se major tournament ang maia inkhel hautak leh hahthlak a ni. Chak lo zawkah ṭang mah ila insiamṭhat nghal ka tum ang," tiin a sawi.

Murray leh Djokovic te hi vawi 36 an inhma­chhawn tawh a, Britain tlangval Murray hian vawi 11 hnehna chang ve tawhin nikum November thla khan ATP Tour Finals-ah hnehna changin world number 1 nihna a lo chhuhsak tawh a ni.