Barca record nihrualtu Real chak chiang

La Liga hmahruaitu Real Madrid chuan Inrinni zan khan Granada 5-0 zetin an sawp - match 39 zet chu a zawnin tlawm hmel an hmu tawh lo a, Barcelona-in Spanish club zinga tlawm hmel hmu lo rei ber record an lo siam tawh chu an nihrual.

Zinedine Zidane-a naute hian minute 32 an khelh thlen meuh chuan 4-0 in hma an hruai der tawh a, rin loh taka James Rodriguez aia inkhel bul ṭantir Isco chu Real player zinga langsar ber a ni - Spanish attacking midfielder hian a hun ṭha neih chhunah Real tan khelh a phu tih lanrtirin goal hnih a khung.

Goal khung te lek lek!

Inkhel ṭan aṭanga minute 12-na lekah Isco chuan Karim Benzema hnen aṭanga a ball hmuh chu an hmahruaina goal ni turin a khung nghal a, French striker Benzema hian minute riat a liam hman awrh tihah Granada goalkeeper Guillermo Ochoa-a'n Luka Modric goal shot a man ngheh tawk loh zar zoin an goal hnihna a khung ve lehnghal - Benzema hi chiang takin offside mah se linesman berin a phar tlat lo.

Real-in goal an khung hnem a, Cristiano Ronaldo hming a lang tel lo thei lo. Portuguese forward hian minute 27-naah an goal thumna a khung ve leh a, Isco chuan Modric-a cross aṭangin a goal hnihnna a khung bawk. Goal dang lut loa chawlhlawk hman a nih hnuah Real tan Casemiro a inlar ve thung a, Brazilian defensive midfielder hian substitute James Rodriguez free kick aṭanga ball kal chu an goal ngana ni turin a khung.

Zidane-a nauten goal nga zet an khung chungin goal tam zawk khung thei dinhmunah an ding a, Mexico international keeper Ochoa chuan Dani Carvajal leh Marcelo te pet goal ngei tur nia ngaih chu ṭha takin a dan sak. Real tana chanchin lawmawm lo erawh hliam vangin Isco lak chhuah a ngai kha a ni.

Chawimawi phu Ronaldo

Ronaldo tan nikum kha kum chhinchhiah tlak a ni. Real-in Cahmpions League nomawi an chawi theih nan player thawh hlawk a ni a, Euro 2016-ah captain armband hreng chungin Portugal chu a champion pui bawk. Hei mai a ni lo, Club World Cup-ah Real hi December khan a champion pui zui a, a vawi li nan Ballon D'Or a dawng bawk.

Real Madrid-in an fapa rangkachak hnathawh hi an hmuh hmaih lo a, Santiago Bernabeu a inkhel ṭan hmain Portugal captain chawimawina hun an hmang. He hun hi Real Madrid legend Luis Figo leh Raymond Kopa, England striker hlui Michael Owen leh Brazilian striker ropui Ronaldo ten an hmanpui a ni.

Zidane-a thukhawchang

Real Madrid manager Zine­dine Zidane chuan, "Hnehna chan hi thil pawimawh ber chu a ni a, chumi ruala kal tel nghal chu eng angin nge hnehna kan chan tih hi a ni. Kan khel ṭhain inkhelah kan rilru kan pe em em a, chutiang taka kan tih chuan mipuiin inkhel hmuhnawm tak an hmu thei a, keini tan pawh a nuam a ni. Ka lawmna ber chu inkhel ṭan tir phat aṭanga bul kan ṭan ṭha em em kha a ni a, ball kan chan loh lai pawn kan taima em em a ni," tiin a naute khelh danah a lawm hle.

Griezmann a lo kir

Antoine Griezmann chuan Atletico Madrid tan league match 10 chhung zet goal a khung tawh loh hnuah goal a khung ve leh ta a, khualmualah Eibar chu 2-0 in an hneh. Atletico tan Saul Niguez chuan an khingpui goal lama an nawr hmasak berah a tauh lut nghal a, Premier League nena sawizawm hlawh tak Griezmann chuan substitute Kevin Gameiro nen mawi taka an in one-two hnuah an goal hnihna hi a khung ve leh a ni.

Atletico Madrid boss Diego Simeone chuan Griezmann-ah an innghah thu sawiin, "Griezmann hi kan innghahna a ni a, he team-in kan hnathawhte goal a chantir turin kan beisei ṭhin a ni. Chutiang chiah chuan Fernando Torress leh Gameiro te pawh hi goal min khungsak tura beisei an ni," tiin a tlarhma te chuan an chet ṭhat leh ṭhat lohah mawhphurhna thui tak an neih thu a sawi.