East Bengal leh Aizawl FC intiat

Inrinni zanah East Bengal-in kum khat liam taa Kolkata khawpuia 2-0 a an hneh Aizawl FC chu hun tawp hma hreta Ivan Bukenya tauh goal hmangin an draw hram.

Barasat Stadium khata entu pungkhawm hmaah East Bengal defender Gurwinder Singh-a own goal hmangin first half-ah Aizawl FC-in hma an hruai a, minute 89-naah mualneituin substitute Ugandan defender Bukenya hmangin an sut a, 1-1 in inkhel a tawp.

Aizawl FC hian coach Khalid Jamil hnuaia an match hmasa berah East Bengal lakah point khat an hlawh chhuak a, season liam ta aiin tun season-ah MPL club AFC hi an ṭha zawka ngaih a ni. January 13, Zirtawpni hian Mizorama an match hmasa berah Minverva Punjab FC an mikhual ang.

Inlan leh inlan lo

East Bengal-in Mizo pathum an kawl a, Indian Super League-a Atletico de Kolkata champion puitu Lalrindika Ralte leh Robert Lalthlamuana te chu inhliam vangin squad-ah dah an ni lo. Season liam taa Aizawl FC cap­tain David Lalrinmuana erawh squad-ah awm mah se British coach Trevor Morgan-a'n khelhna hmun a siamsak lo.

Aizawl FC-in Mahmoud Am­nah an la lut a, Syria international hlui hi first match hmachhawn turin a la inpeih lo. RG Stadium-ah erawh Sporting Goa aṭanga AFC zawmtu hi a inlan tawh ngei beisei a ni. Chennaiyin FC aṭanga loan hmanga hawh Jayesh Rane-a'n Kolkata aṭang chauhin practice zawm mah se tlarhmaah Ivorian forward Kamo Stephane Bayi nen an inkawp nghal.

Season liam ta I League aṭanga thlir chuan Aizawl FC mi thar panga bul an ṭantir nghal a, MPL hnuhnung ber aṭanga thlir chuan mi thar pakuain bul an ṭan thung a, Lalrinzuala Khiangte leh Albert Zohmingmawia te chiah MPL-a AFC tana inlan an ni.

Goal khat

East Bengal-in ball chang tam nghal mah se awm ze neiin inkhel an thunun thei lo a, Aizawl FC-in goal venhim hna an thawk.

Darkar chanve hma hretin ding lama Nikhil Poojary hnathawh sengin Wedson Anselme-a'n goal khungna hun ṭha a nei a, Haitian midfielder ball pet chu Aizawl Venglai tlangval Lalrinzuala Khiangte-in a dang hman.

Aizawl FC a bet zawkah an ṭang a, goal chance erawh mual­neitu aiin an nei ṭha zawk. Liberian midfielder Alfred-a hnathawh ṭha tak chu Ivorian forward Kamo tan goal khung ngeina tur niin lang mah se keeper Rehenesh tibuai tur khawp pawhin a pet lo. Amaherawhchu first half injury time-ah Rane ball ṭha chu Kamo-a'n a la per a, East Bengal defender Gurwinder ball clear tumin an lamah a pet lut chiang hle!

Vannei vanduai

East Bengal-in goal an ma­mawh avangin darkar 48 pawh India rama la awm tling lo forward Willis Plaza an luhtir nghal a, awmzia a neih theih loh avangin vanneihna zawngin minute 12 hnuah defender Bukenya an luhtir leh bawk.

Aizawl FC-in second half an ṭan ṭha zawk a, Albert-a'n chance ṭha a hlah a, chance ṭha bik hlahtu erawh MK-a a ni. Chhinga Veng FC midfielder hlui hian forward Kamo thawh ṭhat sa chu hnai tak aṭangin keeper Rehenesh-a zawnah a pet a a; substitute Brandon VL Remdika'n ṭum hnih zet chance ṭha a rawn insiam a, goal-ah a chantir thei lo ve ve bawk.

East Bengal an insiam ṭha thei lo a, amaherawhchu Trinidadian forward Plaza-a'n ṭum hnih vel zet theihna sang tak a nei tih a pholang. East Bengal forward Plaza hian AFC defender a bum hnuah kawh zetin goal-ah a pet a, keeper Albino-a'n a dang ṭha takzet. Mizo club an ṭang tluan mai dawna a lan tawh hnuah East Bengal-in corner an hmu a, subsitute Abhinas Ruidas corner pet chu Goan midfielder Rowlin Borges-a'n tauh perin Bukenya zawnah a kal a, Ugandan defender-in East Bengal tana a match hmasa berah goal a khung nghal.

Aizawl FC dinhmun ṭha lo zawkah an ding zui a, East Bengal lamin chakna goal beiseiin nawr mah se goal an khung belh tawh lo a, goal khung belh theihna hun ṭha erawh an nei hman tho.

Jamil a lawm

Aizawl FC coach Khalid Jamil chuan, "Hun tawp lamah kan talbuai tih loah chuan kan khelh dan a lungawithlak a, ka player-te kha an vaiin an khel ṭha a ni. Muankima leh Albert-te khan goal an nawr bakah tlarhnung an pui ṭha a, Zotea khan Kingley a pui ṭha a, Rinzuala leh Ruatthara te khan an tih tur an ti bawk. Midfield-ah BT-a a thawkrim a, tlarhnung a pui ṭha hle. Goalkeeper Albino khan corner an pet khan a chesual deuh tih loah chuan a khel ṭha a, ṭha takin a khel zel thei ang," tiin an khelh danah a lawm thu a sawi.

East Bengal coach Trevor Morgan chuan, "Kan result-ah ka lawm a, kan khelh danah ka lawm lo. Willis Plaza leh Ivan Bukenya te khan an teammate te hming pawh an la hre kim lo a, team angin kan khel lo a ni," tiin inkhelh banah hmasawn theihna tur an la ngah thu a sawi.

Inkhel Result

East Bengal 1-1 Aizawl FC

KEB : Ivan Bukenya 89'

AFC : Gurwinder Singh 45+1' (OG)

MoM : Eze Kingsley, Aizawl FC

Player 12 maw?
Aizawl FC forward Kamo chu inhliam vangin injury time minute thumnaah Lalṭhakima'n a thlak a, amaherawhchu Ivorian forward hian an thlak tawh tih hre loin hun tawp lamah khelmual a rawn rap leh a, hun rei erawh a hmang lo. Mizo club-in hun pek belha minute khat vel chu player 12-in an khel tihna a ni.
East Bengal coach Trevor Morgan chuan, "Player 12 chungchanga ka duh dan sawiin awmzia a nei lo. Ka sawi awmzia chu inkhelh nawn emaw point thum emaw a hmuh theih loh. Thutlukna chu thuneitute kutah awm se, kei chuan sawi theih ka nei lo," tiin hun tawp chungchangah a ngaihdan a sawi.
Ivorian forward Kamo hi khelmual a rah leh avangin yellow card pek a ni a, hremna dang a awm em tih erawh he thuziah lai hian hriat a ni lo. Aizawl FC coach Khalid Jamil chuan, "Tihsual kan nei lo a, match official kha thutlukna siamtu a ni. Ṭhakima khelmual chhunga luhtirtu chu fourth official a ni a, Kamo khelmual chhunga luhtir leh tu chu assistant referee an ni a, tihsual nei an awm a nih chuan keimah ni loin match official a ni. Kha thil thleng avang khan hrem kan nih theihna tur a awm lo," tiin Vanglaini palai a hrilh.