Sir Bobby Charlton nihrualtu Rooney

Wayne Rooney chu Manchester United tana goal khung hnem ber a ni ta! England international hian Inrinni zan khan Reading lakah United tana a goal 249-na khungin Sir Bobby Charlton record kum 44 zet lo ding tawh chu a nih rual chiah a, goal khat dang a khung belh a nih chuan chuh buaitu nei loin club tana goal khung hnem ber a ni tawh ang.

Old Trafford-a FA Cup third round inkhelah champion lai United-in an mikhual Championship club lakah hnehna chang turin harsatna an nei lo. Captain Rooney chuan minute sarihna lekah goal hmahruai khungin first half-ah Anthony Martial-a'n an goal hnihna a khung a, an goal hnuhnung pahnih hi England rawlthar duhawm Marcus Rashford-a'n second half-a a khung a ni thung.

Jose Mourinho kaihhruaina hnuaiah United hian a zawnin inelna hrang hrangah match riat chhung hnehna an chang ta. Kum 2006 January thla khan Mourinho hian Chelsea chu a zawnin match riat chhung hnehna a lo chanpui tawh bawk.

Legend chu...

Manchester United manager ropui bera ngaih Sir Alex Ferguson-a'n kum 2004 khan Rooney hi Everton aṭangin pound maktaduai 27-in a lei chhuak a, khatih lai khan kum 18 chauha upa a la nih avangin a club tharah zir tur a la ngah hle.

Tunah chuan kum 31-a upa a ni tawh a, khelmual chhungah a tleirawl thaza insum zo lo ṭhin ang kha hmuh tur awm tawh loin United tan match 543 a khelh chhungin thil tam tak a zir chhuak tih a chiang a, tun dinhmunah chuan player naupang zawkte tan entawn tlak a ni tawh.

Rooney chuan, "Hetiang hun ka thleng thei hi ka lawm a, a bik takin club ropui United tana hnuhma ṭha ka hnutchhiah theih hi a lawmawm bik. Goal khung belh leh theih ngei ka inbeisei a, chutihrualin ka mi ngaihsan Sir Bobby dinhmun anga ka ding ve thei hi ka tan chuan chawimawina a ni," tiin a sawi.

Record thar chungchang sawi chhun­zawmin Rooney chuan, "Tun kar chhung­in kan khelmualah match hnih kan khel zui leh dawn a, Old Trafford-ah ngei min ṭantute hma ngeiah record thar ka siam theih ka beisei," a ti.

United hian Thawhlehni zanah League Cup semifinal khel turin Hull City an lo mikhual ang a, kar tawpah Premier League nomawi chawi tuma an elpui Liverpool an hmachhawn zui leh nghal bawk dawn a ni.

Kum 79-a upa Charlton khan United tana goal 249 khung tur khan match 758 a mamawh a, hei hi season 17 chhung zet a ni. Rooney hian Charlton nihrual turin match 215-in a la khelh tlem zawk bakah season li zetin hun a hmang rei lo zawk.

England tana goal 53 khung tawhtu Rooney hian kum 2015 khan World Cup champion puitu Charlton-a record (49 goals) chu khumin ram tana goal khung hnem ber dinhmun a lo luah tawh bawk.

A theihna hre chiangtu manager Alex-a'n a ringtawk a, mimal harsatna leh buaina leng vel karah pawh a striker chungah rinna a nghat ngam. Alex a chhuah hnuah pawh manager dang ten Rooney an chhawr chhunzawm a, tunah chuan United an sawi ruala hming langsar ni ṭhin Ryan Giggs, Mark Hughes, Cristiano Ronaldo, Denis Law leh George Best te a khum hnuah Charlton record a nih rual leh ta - goal a khung belh ngei pawhin a rinawm hle.