Watford beiseina siamtu Welbeck

Premier League-ah Thawhlehni zan khan tlak hlau pahnih Watford leh Norwich City an inkhel a, Danny Welbeck-a goal ropui hmangin Hornets 2-1 in an chak. Canaries erawh match li khelh hmabakah table mawngphahah an awm a, thilmak a thleng a nih ngawt loh chuan season liam taa Championship champion te hian season tharah Championship bawk an khel leh dawn.

Watford erawh relegation zone aṭangin point liin an fal ta a, Premier League khel zel turin beiseina sang tak an nei. Nigel Pearson hote hian Newcastle, West Ham, Manchester City leh Arsenal an la hmachhawn dawn a, point khat hmuh pawh a harsat tawh avangin league khel zel turin point thum dang chu a tawk turah a ngaih theih.

Vicarage Road-ah Norwich-in Emi Buendia hmangin minute lina lekah khung mah se Watford-in Craig Dawson hmangin minute 10-naah an sut nghal. Inkhel nung ṭha tak karah tawnhriat nei Welbeck a rawn lang a, Manchester United leh Arsenal forward hlui hian minute 55-naah mawi zetin 'overhead kick' hmangin a pet goal. 

November 26, 1990-a piang Welbeck hi Manchester United academy aṭangin a inzir chhuak a, England tan pawh vawi 42 khel tawhin goal 16 a khung. Amaherawhchu English striker hian United-ah beisei a pha lo a, Arsenal-ah lutin hliam vangin a inlan mumal lo.

Nikum August thla khan Welbeck hian Watford a zawm a, October thlaa a inhliam avangin thla thum chuang a chawl leh a, tun season-ah vawi riat chauh a la inlan. Norwich lakah Welbeck-a'n a thiam thil a pholang a, Watford tana league bika a goal hmasa ber leh goal pawimawh a khung.

Hornets manager Nigel Pearson chuan, "Welbeck hian thawm lian tak nen kan club a rawn zawm a, amaherawhchu inhliam vangin kan chhawr thei lo. A dawhthei a, chet ṭhat duhin a thawkrim. Ka chhawr tam tawk loh avangin hnual deuh chang a nei a, chutihrualin ka thutlukna a rin ngam a ṭul a ni," tiin chakna goal khungtu chungchang a sawi a, Watford no. 10 hian match khelh hma bakah bul a ṭan chhoh zel a rinawm hle.